النت والفيس والعالم ابن التيت ده بقى ادمان صعب جدا تبعد عنه اوقات كتير جدا اقفل الزفت وامشى ومقدرش اكتر من شهر اغيب !!
الحل الوحيد هو انى اغير الباس ورد بتاع الفيس والمدونة واحط ارقام ورموز كتير وما احفظهاش واخدها كوبى وارميها فى اى مكان ويبقى كل المطلوب منى هو حذف .. الفاصل الوحيد هيكون shift + delete وساعتها هخلص من ام العالم العقيم ده للابد وحتى لو حبيت ارجع مش هعرف لان مش معايا الباس ومش حافظه ... ومش بعيدة ارجع باكونت تانى !!!
رغم كل لحظات اليأس والنكد والقرف والبيض الا انى مبعرفش اكره المكان ده يمكن لانى عرفت عليه ناس رائعة ويمكن لانى بهرب فيه من حاجات كتير جدا .... على كل حال اكيد لازم ولابد وحتما محتما انى همشى للابد فى يوم ما ... سواء برغبة منى او من غير رغبة ..
الشيىء الايجابى هو انى رجعت ومش محتاج اى حد اى حد مهما كان ... كان لازم افهم وفهمت خلاص
اقرب الناس ليا ابويا وامى مبيحسوش بالوجع اللى فيا بشوف فى عيونهم الحزن والاشفاق عليا لما بتعب ويبقى حالى زفت الا انهم مبيحسوش فعليا بوجعى فالبتالى محدش هيحس بيا غيرى محدش هيعرف ايه بيدور جوايا من فرح وحزن غيرى محدش هيوصل للمعنى الحقيقى للعقل والجنون اللى جوايا غيرى .. محدش هيستوعب افكارى غيرى ويمكن دى بالذات محدش كمان هيستحملها غيرى لانها افكار مريبة وغريبة .....
كنت فى بطن امى لوحدى ومكنش معايا حد وهموت لوحدى الفاصل اللى بين لحظة الميلاد والموت لازم وضرورة افهم انى لازم ابقى لوحدى رغم الصحاب ورغم الاهل لازم افهم ان فى حب حقيقى وحب مصطنع ولازم افهم برده انى اخر شى احتاجه هو مساعدة اى حد ليا سواء ماديا او معنويا ....
ولازم ناس كتير جدا فى حياتى تفهم انى مش هتردد لحظة انى اديه روحى واى شىء يطلبه ومش هستنى منه مقابل ،، المقابل الوحيد انك تحترم تقلباتى وافكارى واسلوب حياتى واللى مش عاجبه يتفضل .....
زى ماقلت الفاصل بين حياتى وموتى لازم الكل يفهم انى مش هحتاج لحد فيه حتى لو هتوجع حتى لو هتعب ....
كنت لوحدى وهكمل لوحدى كان لازم افهم ده من الاول وادينى فهمت متأخر .
حلوة الوحدة مفيس كلام ....