اكتر وقت ممكن تلاقينى متنرفز فيه  ورد فعلى عنيف ويوجع لما اقابل حد غبى فى موقف او غبى فى العموم ..
انا كده بطبيعتى ..
افهم انت مش محتاج اكتر من دقيقة علشان تستوعب شىء وتفهم لازم يبقى عندك سيناريو للــ5 دقايق الجايين ..
مثلا ..
سمعت صوت اخويا جى من شغله وانا فاصل الواى فاى وهو هيدخل نت وانا عارف اقوم اشغل الروتر مش هستنى لما يجى يقولى شغله .
بكره الناس اللى مبتفهمش ومش عايزة تفهم ..
النوعية اللى تقولها مالك ترد بكلام ملوش علاقة بسؤالك وبعيد تماما عما تقصد ..
مالك تلاقى كلام من نوعية اشايسالالشسةيىرلاىيشسرثيتصيالربخمكنمىتثيصن ضخصثيضث ىصلايىصثي
حد زعلان منك ..
تعالى قولى فين زعلك شاورلى على الحاجة اللى زعلتك تلاقيه بيهذى ويهرتل ويقول اى كلام ياسيدى جاوبنى فين مصدر زعلك مفيش هو مقموص وزعلان وواخد على خاطره اوى وخلاص .
فى الحقيقة يعنى ابسط انوع المعاملات .. يا ضياء انا زعلان منك علشان بتصل عليك ومبتردش ،، علشان شتمتنى مثلا فى مدونتك ،، علشان عملت كذا وكذا احب الناس الواضحة اللى عارف فين حقه يشاورلى عليه اما غير كده انا صبور وبالى طويل جدا جدا على عكس ما واضح هنا ..
ممكن مزعلش فى مواقف تزعل واتغاضى واكبر مخى ،، انما لو وقفت عند نقطة مزعلاك منى وانت مش عارفها ولا عارف تقولى عليها مش هبقى شخص صبور اطلاقاً وهلعن جدود جدودك وهنكد عليك ..
فمعلش خليكوا واضحين عادى انا فى ناس لما بتكلمنى بقولهم وش معلش انا مش عايز اتكلم ،، انا مبحبكش ،، انت غلط فى حقى كله كلام سهل يتنفذ هيريحكم فى حياتكم ..
بطلوا غباء بقى علشان تعبنا .

ولان الحلال اجمل قررت اتجوز ...
ههههههههههههههههـ احيه !

دور ع اللى ناقصك // مش اى حد وخلاص ..
مش حب والسلام ،، مش جوازة وخلاص ..
مش شخص كويس ومؤدب ومحترم ،، دور على اللى ناقصك هتلاقيه .

فضفضة

فى ناس مبتتفهمش رد فعلك على كلامهم او اسلوبك معاهم !! انا شخصيا مش هقعد افصص كلامى خده زى ما تاخده .
فى ناس انت بتتعلق بيهم لدرجة انك تحس انهم الهوا اللى بتتنفسه مش هتعيش من غيرهم بتنام وتصحى بيهم بتتمناهم بتحس انك هتاخد مفاتيح الجنة لو كملت معاهم بتحس انهم رمز سعادتك الابدى !
الناس دى لانك ضيق الافق وغبى وحابس نفسك انت بتيجى على كرامتك وتتحايل وتهين نفسك علشان يفضلوا او علشان بس يقولولك كلمه حلوة ..
وتفضل تقولهم اشياء من هذا القبيل لو بنت او ولد "" طب انتى مبتكلميش ولاد اشمعنى انا ؟" طبعا عايز تسمع كلمتين ثناء فى حقك او تاخد طاقة ايجابية لانك عايزها ..
بنت طب "اشمعنى كلمتنى انا والبنات كتير " عيزاه يقولها كلمة تطمنها بس انه هيفضل ..
الناس اللى من النوع ده بتفضل تحارب علشان تحافظ على شخص متسلط واحمق وغبى فى دايرتها بيجوا على كرامتهم وعلى نفسيتهم واعصابهم .. بتلاقى الطرف التانى فى القصة بيدفع بكل قوة نفسه برة الدايرة والاول بيدافع بكل قوة علشان ميخرجش .. وفى وقت ما وفى سهوة ما قلبية او عقلية او صدفة بيفلت صاحبنا المتسلط برة الدايرة عافية وغصب !
هو ممكن يكون فاهم انه ضامن وجود الشخص الاول دايما وانه هيتحمله وممكن كمان يكون فاهم انه هيلف ويصيع ولما يسوء حظه هيرجعله يلاقيه مستنيه وفاتحله حضنه بس غالبا هو غلطان ،، الانسان اللى بيدافع عنك وبيبذل كل طاقته علشان متخرجش برة دايرته افهم كويس انك لو خرجت قيمتك = 0 بالنسباله بعد كده حتى لو انت جيت راكع تترجاه !
لان الطرف الاول مُرهق وفقد كل طاقته فى الدفاع لانه حاول كتير يقنعك تفضل موجود برضاه ورضاك لانه قالك خليك وانا هعملك كل اللى تحبه وهو فعلا كان هيعملك كل اللى يبسطك ويسعدك بس انت مش مدى نفسك فرصة تشوفه كويس مش مدى نفسك فرصة تحبه مع انه يمكن بنسبة كبيرة هو انسب حد فعليا ليك !!
افهموها وخليكوا واضحين وصادقين فى مشاعركم الاتفاق شىء مريح ومناسب اتفقوا ع صداقة او حب او زمالة او معرفة ..
انا اللى هحدد اذا كنت هخليك تحبنى ولا لا بمعنى انك لو بتحبنى بقدر معين انا بتعاملى هخليه يقف لحد كده ويقل كمان مش بقلة ذوق ولا حاجة بس الحب لما يقابله حب بيكبر الحب لما يقابله تجاهل وخذلان بيقل ويختفى ويموت .. الشىء المقابل للحب الشديد التجاهل الشديد عكس الحب التخلى مش الكره ... يعنى حضرتك من دلوقتى اقعد كده قيم علاقة الناس بيك اللى بيحبك قوله هو ايه بالنسبالك وخليه فى حياتك مع الوقت هتلاقيه لقى اللى يناسبه وجى يحكيلك اللى ليه مواصفات بيدور عليها اللى ليه احتياجات بيدور عليها مش هيستناك تكمل علشانه خصوصا وانك بتتجاهله ومش عايزه ...
فياريت يعنى كلنا نفهم انك لو خرجت من دايرة حد حتى لو كلمته فهو هيكلمك من باب انه كان يوم يعرفك وبيعزك وبيحبك مش من باب الانبساط والاهتمام والانشكاح .. انت نفسك هتحس  بالاختلاف فى التعامل ولما تحس بيه انسحب وافضل برة الدايرة وبعيد لان بتلقائية شديدة هتلاقى نفسك بتتعامل بقسوة وتجاهل وهتلاقى خذلان زى اللى انت سببته بالظبط مقابلك .. فــ حضرتك مصونتش كرامة اللى قدامك واهنته بدون قصد او شكل غير مباشر وانت برة الدايرة صون كرامتك لانك مبقتش مهم وبشكل غير مباشر هتاخد نفس معاملتك القديمة .
حاجة اخيرة .. شىء قمة القسوة ان يكون فى ايدك حاجة قادر تديها لحد وتبخل عليه بيها ..
حاجة كمان الشخص اللى عنده فرط فى مشاعره نحيتك وبيعشق التراب اللى بتدوس عليه فى حد تانى نفسه بس فى كلمة منه واضح اننا كلنا عايشين فى دواير مش بتاعتنا او كل موجب بيروح لموجب زيه علشان يحصل تنافر !
ايا كان حافظ ع اللى ليك .

لو فى بين كل مراكز المنوفية شىء مع مركز تلا نصلحه يا اخوانا ونراضى بعض عيب كده والله ..

يعنى كل مراكز المنوفية جميلة ونضيفة وفيها خدمات الا مركز تلا تحس مثلا انك رجعت لسنة 1950 ولو فاصلنا شوية احتمال نلاقى ناس طالعة تهتف لعبد الناصر وبتطالبه بالبقاء فى حكم المخروبة !

ياجدعان عيب والله مش معنى ان مطلعش منها رئيس او زير تتجاهلوها كده .. انا نفسى دخلت المركز الساعة 12 على ما طلعت منه بس طلعت ع 4 !

قرى وعزب وكفور وطرق لا تصلح الا للجمال !!!!!

لو حد هنا من تلا ياريت يعتصم ويطالب انه يبقى زى شبين او منوف او حتى الباجور وانا هشجعه واسانده .

جيت من شغلك طول النهار مستحمل غباء الناس والحر ،، جسمك اتهد من اللف فى بلاد الله ..
رجعت البيت لقيت اكل جاهز بس امك او مراتك نايمة ..
جهزت حمامك لنفسك ،، ولعت ع الاكل ووطيت ،، لقيت هدومك وسخة حطها فى الغسالة ..
خدت دشك .. اكلك سخن واكلته .. الغسالة خلصت واخدت هدومك نشرتها ،، تعبت ؟؟؟!!!!
انا بكره الناس اللى مبتفهمش وممكن يرجع مستحمل كل الدنيا وينفجر فى وش امه او مراته او اخته ..
لما دخلت بيتك لقيت نفسك متعصب وزهقان اترزى لوحدك .. مش صعبة انك تعمل كل حاجة لنفسك .

الدعاء ليه مفعول السحر .. بس يمكن يتأخر شوية لحكمة لا تعلمها يمكن لما تدعى سنين متاخدش اللى عايزه ولا تنوله لحكمها هتعرفها فى الدنيا او تُكافأ ف الاخرة .

الصدقة ليها مفعول السحر فى الحال ... الصدقة هتلاقى اثرها على طول فى اقرب وقت .

اخلصوا النية ،، تــصـــدقــوا .

انا مُحبط جدا ويائس ،، انا بكره الوجع ،، بكره الظروف وبكره كل حاجة حوليا دلوقتى ..
حقيقى انا مُرهق ومعنديش اى حلول لاى حاجة .. ومش فاهم حاجة انا حتى مبقتش عارف انا عايز ايه ..
بر امان هو اللى يلاقينى .
راحة هى اللى تلاقينى .!

وانت  عالم يارب بالخير والشر ...

خلاص يا جماعة انا مش هبقى اهبل تانى ومش هثق فى حد ومش هصدق حد كده عنب اوى كفاية ...

مش ههتم بحد ومش هطلب حاجة من حد ومش هستنى حب مزيف لما توصل لمداه يسيبوك ويمشوا والاسم انهم عايزينك تكمل !

من غبائى الشديد انى وانا فى الجيش قائد اللواء ظلمنى جدا وتانى يوم كان فى حادثة قدام اللواء وقالوا ان قائد اللواء اتضرب بالنار ولانى كنت اتحسبنت عليه كتير صدقت وقلبى اتملى تصديق !!

ده موقف من ملايين المواقف اللى ممكن ينضحك عليا فيها واصدقها واكتشف انى كنت غبى وساذج !

ايوة بغلط 

ايوة غلط غلطات لا تغتفر 

ايوة لسة هغلط 

حاجات مقصودة وحاجات لا تصرفات مقبولة وتصرفات لا ..

مش هصدق ان فى حد مثلا زعلان انى برة حياته ومش هصدق نفسى ان اللى سابنى هو الخسران فعلا لانى من جوايا مش بالسوء ده ،، مش ثقة فى نفسى انا عمرى ما كان عندى ثقة فى نفسى .. بس وجعت ناس بدون سبب ومبرر ..

كل مشكلتى فى الحياة انى بصدق وبقدم كل اللى املكة وباجى على نفسى واظلمها ..  مواقف كتير متتحكيش وتفاصيل متتكتبش وخوازيق لبستها لو حبيت احكيها مش هعرف حاجات فى النفس كده بتتحس ..

اسف اوى لكل الناس اللى ظلمتها ووجعتها واثبتلها انى شخص قذر ،، واسف جدا لنفسى اللى اهملتها حتى الحادثة اللى اتصابت فيها اتطوعت علشان اريح انسان وسخ وابن كلب وادينى خسرت برده كعادتى .

كفاية كذب وكفاية نفاق 

شكرا اوى .

وتوثيقا بس لانى نحس ومعروف جبت موبايل ومكلمش معايا شهر وبيعته ورغم انى برتبط جدا باى حاجة اتشريها اول مرة فى حياتى ابيع حاجة شخصية بس مرحش بعيد عنى يعنى ،، يقوم ايه بقى اللاب شاشته تتكسر ،، والكمبيوتر العادى الكيسة تتسرق من عند صاحبى علشان كان فى مشكلة فى الهارد بيصلحها ^^ وارجع اشتغل ع كيسة قديمة جيجا بايت قديمة فحت ورامات 1 ^^ يا فرحتى ..
يا ميٍلة بختك يا ضيا ... النحس نحس ..
سجل يا تاريخ علشان بيقولوا انى محظوظ .

رأى _1400

الراجل العربى او المصرى خصوصا فى الجواز او نظرته للبنت بصفة عامة انها شىء اتخلق مش علشان يكمله لا علشان يطيعه ويمارس عليه ساديته !
يعنى من مواقف بشوفها كتير بتخلينى استحقر فئة مننا كرجالة وهى الغالبة للاسف ... بلاش اتكلم عن الاخت والام لانهم بالفطرة بيحبوك ويستحملوك ويعملولك اللى تحبه ..
خلونى اتكلم عن الزوجة ..
بستحقر الشخص اللى يحاول يرضى علشان يكسبها مش بيحاول يفرحها علشان بيحبها ...
النوع اللى فاهم ان المطلوب منه ..
مصاريف كل شهر وشوية الاكل يرميهم فى المطبخ وهى تتصرف مع نفسها ...
يمارس معاها الجنس وتحمل وتتعب ويطلع عينها مع نفسها ...
تخلف وترضع وتشيل وتسهر مع نفسها كان ده بس شغلها ،، يبقى هو برة مبسوط وهى فى البيت بتعانى مع ابنه ،، يبقى نايم بيشخر وهى قاعدة فى ابعد اوضة علشان عياط الولد ميصحيش الباشا !
قمة الانانية ،، قمة التخلف والحمق ..
حقيقي اشكال انا مش فاهم عايشين ليه ومهما كانت ضغوط حياتك ايه ذنب حد اختار يعيش معاك انه يتحول لآلة ؟!!
مرة شفت مشكلة واحدة زعلانة علشان بس جوزها مبيقولهاش كلام حلو !!!!!!!!
آه يا ولاد المرة هو الكلام الحلو بفلوس ؟
تطيب الخاطر بفلوس ؟
دلوقت بديت افهم نصايح ابويا دايما يقول ..
مفيش بنت تنضرب ،، مفيش بنت صوتك يعلى عليها ،، اللى تدخل بيتك متتهانش ولا تتعاير ،، اللى تتقدملها وترفضك اشكرها علشان لو وافقت وهى مش مقتنعة هتتعبك .
مش هتكلم عن الدين ابدا والسيرة ورسولنا القدوة ,, بس هتكلم بالانسانية ،، بالود ،، بالاحتواء ،، بالحقوق ،، بالاحترام ،، بالفهم ،، بالواجب ،، بالاصول بين طرفين .
شكلى ايه لما ابقى راجل كده وعندى بيت وتبقى مشكلتى مع زوجتى انى بكلم بنات على النت ؟!!
فى وضاعة اكتر من كده ؟
هى الناس مبتحسش انها صغرت ف نظر نفسها من افعالها ؟
للاسف عقلية الراجل المصرى خصوصا مش هتتغير ومشكلته انه فاهم انه صايع وعارف كل حاجة وهو مغفل  ،، اقسم بالله فى بلاوى سودة فى كمية بنات بتخون ازواجها مخيفة ومهولة انا نفسى بتصدم لما بسمع عن فلانة بنت ناس كويسة ومن عيلة انها ع علاقة بكذا ومبحبش اسمع اصلا علشان بحزن !
تلاقى اصل المشكلة جوزها وتعامله واسلوبه ده غير انها ممكن تكون مغصوبة عليه او مش بتحبه .. دايما قبل ما تلوم بنت على خيانتها بص على جوزها معاها فى البيت معاملته واسلوبه ..
طبعا مش مبرر لانها تغلط ،، بس كل شى ليه طاقة وكل حاجة ليها احتياجات ..
وطبعا الحياة مش مثالية بس ع الاقل يعرف امتى يزعلها وامتى يتحمل ويسكت ،، يعرف لما تزعل يصالحها ويبسطها ،، يعرف لما ينكد عليها يفرحها ،، يعرف يحسسها بس انها صاحبة فضل عليه وده مش صعب الفهم نعمة وكده كده هى فى وشك وملزمة منك الانسان الذكى اللى يعرف يحتويها وميخليهاش محتاجة الا وجوده
لو مسقتش الورد هيدبل ويموت ..
حد يزعل الورد ؟؟؟!

بمناسبة ان فاضل تدوينة ويبقى 1400 منشور  ف المدونة دى .!
فذكر ..
علشان بس لو حد عدى من هنا يوم ما ميقعدش يتفلسف على نفسه ،، اولا ده مكان بكتب فيه حاجات ضايقتنى ،، انفعالاتى ،، افكارى ،، مشاكلى واحوالي زى ما اى حد ممكن يكون بيكتب يومياته ،، يعنى مش فاهم انى كاتب او شاعر ..
اللي بكتبه ده ملوش اى علاقة بالادب عموما ولا حتى حصل خاطرة ..
علشان بس الناس اللى بتكتب هبل وفاهمة انهم كُتاب وشعراء كتروا اليومين دول ..
غالبا محدش يعرفني شخصيا يعرف ان عندى مدونة حتى اخواتى عارفين انى بكتب بس ميعرفوهاش ولا دخلوها ،، اللى بيدخل هنا وفعلا يعرفنى 3 ،، 4  بالكتير ... انا مخبيها ومش عايز اقول لحد ولا عايز حد يشوفها يمكن فيها حاجات كتير مش هيفهمها الا اللى يعرفنى شخصيا وساعتها تتحسب عليا او ليا ...
عموما انا بشوف حاجات كنت كاتبها من مدة واضحك واقول لنفسي قلب امك ياخويا ^^ وكنت عامل كده ليه فى نفسك ؟!
فعادى يعنى ^^
غالبا انا لو مت فى ناس هتفتش فى مكتبى وكشاكيلى هيلاقوا فيها مدونتى دى بحساب الفيس بكل حاجة ليها علاقة بيا ع العالم ده يبقوا يدخلوا يشوفوها وساعتها يدعولى او يسامحونى او يفهموا حاجة .. او يعرفوا مصايبى ويبنولى مسجد مثلا ^^
او حد يعملى صدقة جارية انشالة حتى يخلف عيل ويسميه صدقة ويجريه فى الشوارع ...
مطلوب من حضرتك ايه ايها الزائر اللطيف الجميل ؟
انك متحكمش عليا انا فاهم انى بهجص هنا لا انا فاهم انى كاتب فشيخ ولا اصلا بعتبر نفسي عندى موهبة الكتابة ولا مقتنع بنفسي .
دى بس حاجة كده مش مفهومة انى هموت وهى هتفضل بكلامها ده لوقت لا اعلم متى سينتهى .. !
فياولاد الحلال هذا وقد ابلغت ما لدى .

ياللي إنت صابر ع الوجع خد مُسكن خليك جدع ومتقرفناش ...
كيتوفان ،، الكوفان ،، اوفلام ،، كتافلام ،، بارامول ..
وشوفلي معاك حاجة تجيب نتيجة ومتجيبليش حساسية ...
ياللي إنت صابر ع الوجع اشرب ترامادول ^^

وف عز اضرابي عن الشغل والنزول من البيت اصلا مكانش ناقصني غير تكييف وبُعد شوية الوجع عني ،، أنا مليش نفس أخرج من البيت اصلا .

الانتخة حلوة ..

خلصت تعليم ...

خّلصت جيش وخلصت ...

مبقاش ورايا حاجة ،، الإضراب حلو .

للشخص اللي بعت تعليقات ،، معلش لا مؤاخذة 😂 بتتمسح غصب عني ،، بدل ما بضغط نشر بتيجي حذف !
قلت أوضح بس لأن دي مش اول مرة تحصل .
الزرار معاندني ^^
عموما يعني لما اتكلمت عن الشهرة مكنتش أقصد اني منهم خالص لأن محدش يعرفني اصلا دول حتى شباب من سني من كتر ما اختفيت نسيوني وميعرفونيش ^^

 كبروا دماغكم شوية معلش ،، تغاضي عن حاجات كتير ،، في حاجات في الكون بتحصل ملهاش تفسير !
غلطة مش نهاية الكون بالنسبالك .. لو بصيت في أصعب موقف وأشد محنة عديت فيها هتلاقي الشمس لسة ف السما والكون زي ما هو مفيش اي تغيير ،، كبر دماغك سيب اللي قال قال اللي عمل عمل اللي غلط غلط سيب كل الأفعال والتمس عذر وسامح فضي قلبك من هم غلطاتهم في حقك ..
متركزش ومتشغلش بالك بمين قال مين سوى ..
نفسك نفسك واللي ليك .

شئ لطيف انك تبقى مشهور وناس كتير تعرفك ،، حاجة بتديك ثقة في نفسك .. بس في ناس ثقتها الزيادة بتخليها تتنك على ناس تانية عنده في اللاوعي كده احساس بأنه عنده ناس كتير يتمنوه أو مستنيين منه كلمه علشان يبقوا أصحاب وجنبه ،، في حقيقة الأمر الشخص ده وسط دول كلهم عنده شخص بيحبه حقيقى ومش هامه هو حواليه اد ايه بس ثقته ف حبه واللي هيقدمه أكبر واكتر من الناس الكتير اللي موجودة !
فكرة أن في ناس كتير حواليك جميلة بس في النهاية أنت لوحدك !!!
هتواجه كل شي حتمي لوحدك !
علشان كده بشكل ما أنا بكره الشهرة بحس أنهم ناس مزيفة متشاف فيهم الجانب الإيجابي الجميل أما الوجه الآخر مخفي بنواياه الطيبة أو الخبيثة .

من منا ارتوي ?
من منا أشبع ظمأ قلبه ?
من منا لم يخسر ?
من منا حاول مرارا وخسر ?
من منا ظلم الاخر ،، من أصبح أشد ندما على فقد الآخر ?
من منا خاض حروبه ضد الآخر من منا انهكه الوجع وخسر كل معاركه ،، من منا فقد قلبه في ساحات حروبنا ،، من منا أهان الآخر ?

وَلَنَصْبِرَنَّ ....

كارتون بطاريق مدغشقر

حبايبى ^^

أوقات ممكن اكتب حاجة او تيجي على بالي فكرة واكتبها وبعد مدة الاقيها بالنص مكتوبة لحد من زمن فات أوقات كنت بقابل حاجات بالمللي زي اللي كاتبها أو بتدور فى دماغى وبكون أول مرة اشوفها واقرأها يعني مثلا مش قريتها وعقلي خزنها وكتبتها بنوع من الاستنباط ! طبعا في حاجات بديهية اي حد تيجي ع باله والأفكار مش حكر على حد ...
بس انا قلت حاجة زي دي  بالنص لأني لاحظت ناس فعلا كرهت الحياة واتقبلت فكرة الموت وماتوا وشفت حد لأنه حابب الحياة ونفسه يعيش نجا من حاجات مرضية صعبة جدا وعايش وزى الفل !

اللي عايز يصالح حد يصالحه بليل ..
اللي عايز يبوح لحد يبوحله بليل ..
اللي مزعل حد ومشتاق ليه يكلمه بليل....
اللي بعيد عن حد ومستنيه يرجعله حتى لو متخانقين ومتخاصمين استناه أو كلمه بليل ..
كمية حنين وصدق ف المشاعر والأفكار بتبقى غريبة لدرجة أنك لما تصحى الصبح تستغرب جدا من نفسك أو يمكن اندفاع مشاعر !
الناس ليهم مثل بيقول كلام الليل مدهون بزبدة يطلع عليه النهار يسيح ^^
متنساش بعد ده كله متصدقش كل اللي هتقوله وتسمعه بالليل رغم صدقه أحيانا 😁
أو اعمل توازن بالنهار 😁
ايه العلاقة بين الليل والحنين والحب والصدق والاحتياج والافتقاد والبتنجان المخلل ?
  الواحد لازم يقرأ ف الموضوع ده ويفهم .

والفقر مش فقر مال ده فقر عقول وافكار وتعامل وأسلوب .

شكلنا داخلين على بلاوي ،، البلد دي فعلا ذنوبها كترت اوى ،، والوساخة كترت فيها ..
لازم تتعاقب طبيعي جدا لو حصل مصيبة نقبلها لأننا لازم نتعاقب ولو ربنا مأخرش هلاك القرى ليوم القيامة كان زمان مفيش حاجة اسمها مصر اصلا !
العمر الافتراضي لينا بقى قصير ،، سامحوا بعض ..
اغفروا لبعض الذلات ،، محدش يشيل ف قلبه حاجة لحد صفوا القلوب والأرواح  ،، انسوا الإساءة وبدلوها بموقف طيب ..
أنا مش شايل حاجة ف قلبي لأي حد ،، اللي شايل مني يسامحني ^^.
خليك من أهل العفو ع الناس .

عن الفرصة الضايعة ،، عن تفاصيل ،، عن سبب رفض مبهم وغير مبرر للغير .
سفر .. رفض .. ليه ?!
فكرة انك هتسيب كل حاجة بيتك شوارعك والأماكن اللي عشت واتربيت فيها وانت مرتبط بيها مش متقبل فكرة اني مش هشوفهم ولو شفتهم ممكن يكون بشكل تاني ،، فكرة اني عايز أكون موجود وكل حتة في المكان بتتغير ،، بتتهد وتبقى للأسوأ أو للأفضل ..
فكرة هسيب أهلي وأصحابي اللي اتعلقت بيهم ،، فكرة لو حد حصلة حاجة لازم ابقى موجود وبتحصل قدام عيني وف وجودي ،، فكرة الخوف من شئ مجهول اني هبقي لوحدي شخص قائم على اللاشئ معنديش إي دافع غير المادة ،، حوليا فراغ !
التعلق بالأشياء والأشخاص وحش جدا ،، الحنين لحياة وأجواء معينة غباء ،، الخوف من مصايب القدر عقم كده كده هيحصل بس نفسيا مش هتقبله في بعدك وهتقبله في قربك لما يحصل قدام عنيك !
قصة الفقدان والتخلي ،، الخوف وسيناريوهات الخمس دقائق الجايين ممكن يحصل فيهم ايه ?
أسباب كتير خلتني ارفض فرصة ،، يمكن كل ظنوني دي ملهاش أساس أو وجود ..
بس انا بستكتر أفرح بستكتر اتبسط لوحدي ..
لو خرجت أقول أنا هنا وامي مشافتش المكان ده ومبتخرجش وتتبسط ،، واخويا قاعد ف البيت واختي نفسها تتفسح وصاحبي حاله وحش ويتمنى يغير جو !
عايز دايما كل اللي حوليا معايا وقت الانبساط علشان اتبسط فعلا ،، بيصعب عليا جدا فكرة اني ف مكان ما وهم ف مكان .. بيصعب عليا اشوف أماكن وأجواء وحياة جميلة وراقية هم مشافوهاش ومش هيشوفوها ونفسهم فيها !
فعلا أنا مستعد ارفض كل حاجة ممكن تبسطني وتسعدني وتخليني كويس لو هكون لوحدي فيها ولو قبلت مش هتبسط لأنهم مش معايا ،، بشكل ما في ناس بتشوفني متخلف .. بس حقيقي مببقاش مبسوط وأنا بتغدي ف مكان فخم وادفع اد كده وأتصور مع صحابي وفي برة ع الرصيف شخص فقير ومش لاقى يأكل !
حد قاعد مستني جنيه وأنا منشكح !
ولسبب ما أنا مش هتقدم خطوة علشان محدش يشوفني أحسن منه !
بكره اشوف حد فقير حد منكسر حد محتاج
لسبب ما مش هتبسط وامي محشورة ف المطبخ ف الحر ومرة قالتلي نفسي اخرج مش هتبسط واخويا غرقان ف شغله الممل واختي نفسها تخرج وصاحبي نفسه يبقى معايا ،، مش هتبسط واللي ليا وحوليا مش معايا .. عارف انى متخلف وغبي وبفكر بشكل متعب ،، لسبب ما أنا مكنش مفروض اتولد اصلا .
في حاجات مش عارف اوصفها اصلا بالكلام والفضفضة بس دي أسباب لقلة انشكاحي مفروض تتسجل علشان ف يوم ما يمكن تريح حد يمكن تبرر أسباب رفضي بدون تفاصيل لحاجات اكتر .

لا لوم على القلب ،، لا لوم على العقل ،، تلك هي الحياة !
فمن بؤس أفكارنا ،، من فقر أحلامنا ،، من قلة فرص البقاء ،، من الشقاء ،، من العجز ..
يصنع القلب فرص وهمية مزيفة ويصدقها العقل مخبرا النفس بأن القادم اجمل ،، ناشرا الأمل في شتى ارجاء الجسد ..
لكن للواقع رد قاس للحياة وجع آخر !
شكرا للقلوب والعقول شكرا للفرص التي لا تأتي ..
لا ترهقوا قلوبكم وعقولكم لا تلومهم هم فقط يشفقون علينا من فرط تعاستنا فيحاولون صنع سعادة حتى وإن كانت مزيفة .

ليس المؤمن بالطعان ولا اللعان ولا الفاحش ولا البذئ ،، صدق الكريم .
اهو الواحد لما بيفتكر آيات وأحاديث بتنهي عن أفعال عملناها بحس بخجل ..
حقيقى في ناس مستفزة تطلع الواحد عن شعورة والغريب اني مبنطقش ألفاظ خارجة ابدا ولا بقولها ،، بس ممكن اكتبها عادي وابعتها .
شنقولها ولا نكتبها تاني ان شاء المولي ،، في محاولة السعي للمثالية أو استغلال أكبر قدر من الصبر والاحترام .

زهق
زهق
زهق
زهق
زهقت وقرفت .

ممنوعة أنتي . !

أنا مش عارف الواحد كان هيعمل ايه ف الأيام اللي مفيش فيها نوم ،، شكرا للكارتون ^^
بطاريق مدغشقر دي لوحدها بتخرجني من أي مود ،، أول مرة أشوف مدبلج مصري رائع هو وتيمون وبومبا ..
قلعة هاول مترجم اللي مدمن تفاصيله ..
أي انيمي ياباني ..
أليس ف بلاد العجائب .. وأي كارتون مدبلج فصحى قديم ^^
حاجة عنب كأن الواحد اتسخط أو اتهبل !

من دفتر الذكريات الوسخ ،، السنة اللي فاتت ف نفس الشهر كان عندنا تفتيش حرب ..
تدريبات وضغط وقلة نوم وشغل ..
كان عندي برد هيموتني وكنت لازم اشتغل غصب عني ،، كنت لما اقول تعبان يقولي ان مكنتش هتسترجل السنة دي هتسترجل امتى !
حرارة عالية ،، وجسمي مكسر ،، ومش قادر أقف ودكتور الوحدة قال يرتاح وهو شايفني بستعبط ..
أيام تدريب الاصطفاف من 5 الفجر ل 3 العصر ف الشمس بالشدة والخوذة !
كان أطول شهر في حياتي شهر 8 ..
كفرت ذنوب كتير فيه ،، وطلع عين أهلي .
أيام الله لا يعودها ،، ذكريات وسخة .
طبعا خطى كان حاجة لوز ،، علشان نفسيتي كانت عنب ،، اه صح وبمناسبة التصوير محدش يشترى h t c علشان بقى موبايل عقيم .

سنقاتلهم بالصبر ،، سنقاتلهم بالحب .

هنعمل ايه يعني !

في ناس كده عنيدة ودماغهم جزمة قديمة ،، بس عادي هنلمعها ،، سنحاربهم بالورنيش .

في إحدى غرف بيته الطيني جلس وحيدا ..

هناك بالخارج بعض البيوت تبعد عن بعضها مسافات كبيرة وما بينهما مساحات من الخير الأخضر ..

ضوء لمبة الجاز يعلو وينخفض ناثرة معها الخوف في كل مرة .. وصوت الهواء الذي يتسلل بين الاشجار ويبعث في نفسه الرعب ..

قطرات المطر التي تُذيب جزء من بيته وتسقط من أعلى السقف .. ويُذاب جزء من القلب معها ..

هذا الجزء المنسي من الكون وهذا القلب المنفي ..

كان صديقنا فتى نحيف خجول لا يتحدث كثيرا ثم إنه لا يملك أصدقاء إلا بعض أبناء قريته الصغيرة ..

همس الرعب في أذنه وبهفوة من هواء الشتاء البارد انطفأت لمبة الجاز التي كانت بمثابة أمه التي فقدها ،، قد كانت تحجب عنه الخوف !

ظل مكانة جالسا لا يتحرك ظناً منه بأنه يخدع الأشياء حولة ،،، كأنه لا وجود له ..

رعدت السماء فانتفض خوفا ،، وكأن كل الأشياء حوله انتبهت ولا حظت وجوده ...

ارتفعت دقات قلبه وارتعدت أطرافه خوفا .. فلربما تخطفه أمنا الغولة ولربما دله عمه على مكان أعواد الكبريت ..

كان صديقنا الخائف يملك أسرة سعيدة قبل أعوام قليلة ما لبست ان تشتت وفُقدت ..

ماتت أمه دون سابق إنذار للمرض ولم يدرك أباه ..

أما جدته قد فقدت عقلها وألقت بنفسها من فوق البيت الطيني ومالبثت أن فرغ الجسد من دمه وماتت ..

لم يبق له سوى عمه الذي كان يحبه ،، في الحقيقة هو لم ولن يحبه لأنه لم يكن إلا شبح بغيض يستمتع بإثارة الخوف في نفس الصغير .. قبل سنوات أشعل عمه النار في جسده وتخلص من حياته ،، وفي كل ليله كأن يأتي شبحا يصرخ من شده الألم طيلة الليل حتى الصباح ،، وبعضهم أقسم أنه رأى جسدا مشتعلا يصرخ ويركض .!

انطفأت لمبة الجاز وارتعد الصغير فعلمت كل الأشياء حوله به ..

تسللت يد في الظلام لتداعب كتفه فالتفت مسرعا وشهق ..

ثم كان هذا الضوء الذي يبدو أنه مُنقذة أحدهم يحمل شمعة يقترب منه رجل طويل القامة يملك رأس كبيرة واذنين مدببتين لديه عين واحدة في منتصف رأسه ولا يملك فم .. تسمر الفتى مكانه وأخذ بالبكاء ومازال هذا الغريب ممسك بشمعته وكأنه لا يراه ومنشغل بالبحث عن شي ما كأنه فمه الذي لا يملكه ..

انكمش صديقنا واغمض عينيه خوفا ،، فطارده وجه القبيح في خياله ،، ثم كان هذا الانين شخص كأنه يتألم .. لم يفتح عينه خوفا لكنه أدرك أن ذو الوجه القبيح يتحسس رأسه .. ثم تقابل الوجهان ..

ذاب قلب صديقنا خوفا .. لكنه لم يتنفس حتى تركه ذو الوجه القبيح .. سمع صديقنا صوت خارج بيته فبث في روحه الأمل والطمأنينة .. واختفى الضوء وصاحب الوجه القبيح ...

خرج صديقنا مسرعا يصرخ حتى وجد أمامه شيخ القرية يهدأ روعه ويسئله ما به ..

ظل يبكي وقد حكى للشيخ كل ما رأى .. فضحك الشيخ وسخر منه وأخبره أنه كان خائفاً وأنه كان يهذي ... اطمأن الفتى ثم أخبر الشيخ لا تتركني ..

اومأ الشيخ برأسه لن اتركك ..

ثم أخذ يحدثه عن شي كان يحدث بالقرية قديما أنه في زمن الأجداد قد جاء سبعة رجال غرباء ..

لا يحدثون أحدا ولا يختطلون ..

وذات ليله سمع أهل القرية صراخ وعويل فخرجوا مسرعين ..

فوجدوا هؤلاء الرجال قطعا ،، كأن هناك من تفنن في تعذيبهم منهم من قُطعت رأسه ومنهم من قُطعت أذنه وانفه ومنهم من أخرجت احشائه ولكنهم كانوا مازالوا أحياء واخبرونا لأول مرة عن رجل يئن في الظلام لا يملك وجها قد رأوه هو من فعل بهم هذا ..

ومن حينها يُقال أن هناك روح تتشكل لتصيد ضحاياها لكنني لا أصدق هذا يا بني فهل تصدق ?

اجابه نافيا صديقنا ،، ثم إنه لم يدرك انه ابتعد عن منزله ..

أمسك صديقنا بيد الشيخ خوفا ،، ثم أطبق عليها العجوز ..

كان يداه ناعمه كثيفة الشعر ،، أصابعه طويلة واظافرة متسخة ،، نظر إلى قدميه فوجده حافيا وقدماه لم يكد يراهما من شده سوادهما في الحقيقة لما يكن يملك قدما اصلا .. التفت إليه الشيخ مبتسما . ..

يملك شعر كثيف ،، وفم اسنانه طويلة يتساقط اللعاب منه ،، وعين واحدة دائرية تتفحصه وتطوف حبه عينه يمينا ويسارا ... ثم بدأ يئن .

................................

مش مقصودة بس ده اسمه تهجيص ،، فضي ،، قلة نوم ..

سموه زي ما تسموه .

ومن ثّمً عانقيني وقولي أنها الأخيرة ...!

كبسولة السعادة التي اهداني إياها القدر في الثالثة فجراً ...
اذهبت همي .. خففت وجعي .. ضمدت جراحي .. سرقت الحزن من قلبي .. غرست املاً ..
انبت زهرا .. آه لو أن يطول بها البقاء .. آه لو تستقر ..
آه لو بقيت ،، لعشت فوق العمر عمرا ..
هذا مافاض من بقايا شعوري اكتبه ،، ولو إنني أمرت ثمانية وعشرون حرفا بالبوح يعتذرون .. لا يتحملون .. لا يُعبرون عما أحمل .. لا يطيقون ..
فهذا كل ما أملك من حروف صغيرة أدون بها ..
لا أعرف غيرها ولا تتحملني .
آه لو تعلم .