ومسيري هوصلك اكيد ..

الخسارة الحقيقية أنك تدخل النار وتعيش مٌخلد فيها ...
الخسارة الحقيقية ان أهل الجنة يعيشوا في نعيم وأنت في شقاء ..
الجنة هي المكسب والفوز والراحة ....
الجنة هي المقصد والهدف والحلم ....
فاللهم جنة تسعد فيها أرواحنا .

مع الفرق إني مبعيطش ... ! :-)

فلتبحث عنه كي تصل !

هذه الأشياء التي تنتهي دون أن تمتد ...
هذا الفرح الذي يتبعه الحزن أينما صار ..
هذا الحزن الذي لا يدوم ويتبدل ...
هذا الجمال الذي يفني سريعا ...
وتلك القوة التي تبددت ..
وروحي التي لا تفرح أبدا ما دام لكل شئ نهاية ..
فما الجدوي إذا من سعادة يتبعها حزن ؟!
من بقاء يليه فراق ؟!
من فرح يتبعه انتهاء ؟!
روحي لا تجد طعما للأشياء ..!
فلربما لأن هناك في النهايات شقاء دائم للخالدون في الجحيم....
ونعيم وفرحة غير مُنقطعة لأصحاب النعيم !
فاللهم جنة تسعد فيها ارواحا لم تجد طعم السعادة في دروب الأرض ،، لم يكن لهم من الأرض والحياة الا جحيمها .

وللحياة بقية ...
فبينما بكي الرائعون من وجع الفراق كان هناك علي الجانب الآخر من الحياة من يستعد للفرح ..
بينما كان هناك من يحمل النعش حزنا ووجعا كان هناك من يرقص فرحا ..
تلك الأشياء التي تجعل روحي تأبي ان تفرح او تجد السعادة ..
تلك الاشياء التي تخبرني أنه ليس هناك علي هذه الأرض ما يبعث البهجة .. وتلك أيضا تُخبرني أنه ليس علي هذه الأرض ما يستحق الحياة .

والروح مُتعبة ،، والنفس مُرهقة ،، والروح ضائعة..
مَللت السفر مللت غُربتي .. وملت روحي من هؤلاء الحمقي ..

صاحب البوست ده مات من يومين .
مين فينا عارف قدره وايه مستنيه ؟!
دي الحياة بإختصار .

لو اللي حواليك في البلالة لازم تكون أنت صاحب فكرة تخليهم يكونوا كويسين يعيشوا كويس لو حد منهم وقع فى طريق ما تشيله وتلحقة ،، حتي لو فاهمين انك في البلالة زيهم !
دايما لازم يكون في طرف اد المسئولية اد الظروف ويجي علي نفسه علشان غيره يعيش ويكون كويس ،، اذا الإنسان محسش أنه الشخص ده ف موقف ع الأقل في حياته يبقي فاشل .

إلي هؤلاء الذين تساقطت أرواحهم واحد بعد الآخر ...
إلي هؤلاء الشيوخ ،،  إلي العُجُز في زوايا المسجد ..
إلي جيران الصلوات ..
إلي من تساقطوا واحد تلو الآخر حتي لم أعد أراهم ..
فلترقد ارواحكم بسلام ،، فلتكن الجنة مثواكم .
ألا بيض الله وجوهكم وجعل الجنة داركم .

وليه أخاف م الوقوع ما دمت بطير .!؟

في كل مرحلة من الحياة بتسيب انطباع !
في ناس حريصة دايما تسيبه كويس وناس بتعيش تندم زي حالاتي كده ع أفعال مخزية وتصرفات وكلام غبي كان يتقال ...
يمكن السن عليه عامل
فترة بيكون القلب مسيطر وهو المتحكم
فترة بتكون الشهوة هي مصدر الأفكار والأفعال..
فترة بتكون الظروف
وفترة أخيرة بيكون العقل والهدوء والاتزان اللي مسيطرين وبالتالي بتبقي متحكم في غرايزك وشهواتك وقلبك ..
بتوصل لمرحلة معرفش إذا كانت وحشة ولا حلوة ..
بترفض تقرب من حد حتي لو طلب ده .
بترفض شهوة حتي لو جتلك لحد عندك.
بترفض حب شخص كنت بتتمناه .
مش فارق معاك حد ولا عايز حد جنبك .
كالعادة يعني أنا بهري وبرغي بس كل شئ ليه أوان متحكموش علي حد بسرعة في دوافع كتير للغلط .

مشاهد ...
كنت في مكان شغل زي مجتمع صغير كده .. كله ناس بتحب بعض ومتعايشين ..
منهم شخص كان تاجر ناجح وغني عربية وسواق وشخص شايله الشنطة وناس شغالة عنده ،، شوية وابتدي يقع .. شوية والحال وقف شوية وباع كل ما يملك ...
اللي شغالين معاه منهم اللي فضل محلك سر ومنهم اللي تاجر واغتني وبقي أكبر من اللي علمه الشغل يوما ما ....
صاحبنا اللي حاله اتدهور عاش فترة زي اي حد عنده باب رزق ومستور ،، لحد ما اكتشف أن حد من ولاده عنده مرض خطير ... قفل مصدر رزقه والله اعلم بحاله .
2
شخص وقع واختفي بعد ما كان عامل اسم كبير .
شخص فضل متعلق ومعافر بعد ما كان كبير
كان بيبكي من ضيق الحال كان كل أمله أنه يسيب البلد دي بس ،، عايز يخرج منها وبس شخص بعد ما كان حاجة مبقاش قادر يشتري لبن للأولاد !
سيناريوهات الحياة هي الاقوي ... الأيام أشد تأثير من الأحلام ،، بلادنا هتساعدك تفلس وتتغم وتكتئب وتمرض وتموت مش هتساعدك تعيش عيشة محترمة .

فلتعلم ياصغيرى أننا لم نترك الأرض خوفا ..
الا فلتعلم أننا لم نخش الموت يوما...
كُنا هُنا يوما بين حدائقنا ،، كُنا هُنا حين داعبت نسمات الهواء وجوهنا ..
كنا هُنا ياصغيري حين أحببنا وحين صار الحزن جزء منا .
كُنا هُنا حين ابتسمت لنا الأيام وكنا حين ادرات وجهها .
كُنا حين كانت دمشق عروسنا ،، لم ننس رائحة شوارعها ..
كُنا هُنا لنا بلاد حين الحرب والسلام ...
كُنا هنا حين خُضبت أرضنا الخضراء بالدماء. ..
كُنا هُنا حين فرقنا العدو وأصبحنا أعداء ..
كُنا هًنا ياصغيرى لنمت شهداء ..
الا فلتعلم أننا لم نترك الأرض خوفا او هربا ..
فلتعلم أننا لم نخشي الموت يوما ..
فلتعلم ان لبلادنا وإن قست نبذل دمائنا من أجلها حين تأن .
الا ياصغيري فلتعلم انك اغلي عندي من أبناء باريس...
فلتعلم ياصغيرى أنني من أجلك أنت تركت الوطن .

من مدة صغيرة كنت اعرف شخص بيحب الورد والصور اللي فيها ورد ،، كنت بتلقائية شديدة كل ما أشوف صورة فيها ورد احفظها علشانه ،، علشان بيحبها من غير ما أبذل أي طاقة او دماغي تشتغل كنت باخدها علشان ابعتهاله .
الشخص ده بعد شوية شاف إني ضايقته وطلب مني ابعد عنه .
بعدت.
بعدها لو شفت حتي قدامي مزارع ورد لا الشخص بيجي علي بالي ولا بحفظ صور وبنفس التلقائية وبدون أي مجهود مش هاممني انبساطه من عدمه .
القلوب لما تقلب .
حافظوا علي الناس اللي ممكن تدفع من عمرها علشان سعادتكم ،، افهموا واتفهموا ... أوقات مبنبقاش شايفين كويس .
ممكن تكون فرصة عمرك وبترفضها .
شوفوا بعنيكم الاتنين بلاش عين واحدة .
أحسنوا الظن .
اتغيروا .
فرصة أديها لنفسك ممكن تمنحك السعادة الأبدية ،، تفتحلك ابواب مكنتش شايفها ،، تديك نتائج تبهرك مكنتش تتوقعها ولا واخد بالك منها .
متخسروش حد سيبوا فرصة للرجوع دايما ،، للارتقاء ،، للتفاهم .
من اقذر الحاجات اللي ممكن تحصل أنك تشوف حد كنت تعرفه ف يوم في مكان ومتكلموش او تطمن علي حاله ، من أسوأ العلاقات اللي ممكن تحصل أن اتنين حتي كان بينهم ولو كلام بسيط صدفة تجمعهم التعالي والبغض يبدأ يظهر واحيانا الشماتة !
الحمد لله علي نعمة التسامح ،، الحمد لله علي نعمة الحب حتي للمسيء لينا .

زي اليومين دول كنت في السلوم ..
صحرا
هارد بورد
كرفان
جبل
برد عمري ماشفته في حياتي .
افرول
وخدمة
وسلاح
وتطهير ألغام و11 كيلو كل يوم مشي .
مكان محدوف وعيشة صعبة جدا ،، وعلي النقيض صحبة جميلة بتهون الصعب .
كنت شايف أن الأيام مش هتعدي وأن شهر 6 ده مش هيجي عدت الأيام وجريت وجه 6 وعدي وهانت الأيام وعدت وخلصت .
كل وجع بيعدي
كل ظروف وحشة بتعدى
كل صعب بيعدي
بس احنا بنستعجل كل شئ قبل أوانه .
حاجات كتير ممكن تتغير بمزاجنا او غصب .
حاجات كتير ممكن تنكسر .
أفكار ،، أسلوب ،، تعامل ،، نظرة .
كل شئ بيتشقلب ويتغير ،، تجارب بنخسر فيها وتجارب نكسبها .
أوقات مبنحسش ،، مبيفرقش معانا ،، مبنزعلش ،، مبنركزش ،، يمكن علشان مش فاهمين او علشان فهمنا بزيادة .
يمكن علشان في ناس مبتتفهمش ويمكن علشان فهمونا بزيادة .
لأسباب كتير بنتغير ونقبل حاجات مكناش متخيلين أننا هنقبلها يوم من الأيام ،، بنرضي بالواقع ونستسلم لما نتعب من المعافرة ،، كل حاجة بنلاقيها مشيت عكس ما كنا عايزين بشكل غبي رغم أن الظروف كانت سامحة ومهيئة نكون أفضل .
لأسباب كتير بنفوق عند نقطة معينة ونبتدي نكون أشخاص مختلفين يمكن مكناش عايزين كده بس كأننا مُسيرين .
لأسباب كتير هتموت جوانا رغبات وأحلام وطموح وأفكار وهتقبل الواقع أنك تعيش زي أي حد تمشي في نفس التراك بنفس الروتين مع المستوي اللي مناسبك واللي أنت فيه .
هيجي وقت تقول آن الأوان ترضي وتعيش وخلاص زي الناس .
لأسباب كتير بتهاجر وتمشي وتغيب وتبقي حد تاني مسخ بين اللي أنت عايزه وبين اللي تملكه .
لأسباب كتير هتفضل السكوت عن الرد حتي لو هتدافع عن نفسك .
لأسباب كتير بنصاب باليأس.
لأسباب كتير هتموت .

افضلوا ورا الشاشات .
ابتدوا وانتهوا وراها .
حبو واكرهو خلالهم.
ازعلوا اتقمصوا وامشوا .
عبروا عن مشاعركم خلال الضوء المنبعث منهم .
أخرجوا كل الحب في الحروف .
قول أنك بتحب ومستعد تضحي اضغط علي الحرف ف الكيبورد بزيادة .
الشاشة اللي ربطت سهل تفك .
الشاشة اللي قربت ممكن تبعد .
مين ممكن يتمسك بالضوء الخارج منها ؟؟!
مين ممكن يحب المشترك والكهرباء من أفعالها وكلامها ؟!
مين ممكن يمسك ف الهوا ويسند عليه ليقع ؟!
مين ممكن يسيب الواقع ويغرق فى الخيال ؟!
مين ممكن يسيب الحقيقة ويمسك في الوهم ؟!
انفعل وحب وتفاعل وعبر واتكلم وأضحك واحزن وخاف واتطمن واوعد وعيش وتخيل وقول من ورا شاشة ! .
غيب وامشي وخاصم وانهي واقطع علاقتك من ورا شاشة !
أحرم نفسك من الحقيقة والوهم .
عقول عجيبة .
الواقع بيفرض نفسه دايما الحقيقة ليها رأي تاني جميل وقاطع وحاسم .
للقرار ،، للبقاء ،، للفناء ،، للخلود ،، للحرب ،، للسلام ،، للهزيمة ،، للنصر .

افضلوا عايشين الوهم .

كل طريق ممكن يتمشى اتمشى .
كل تجربة ممكن تتجرب اتجربت .
كل لذة ممكن تطلبها اتنفذت .
كل رغبة كانت مطروحة اتحققت .
كل هدف اتحط خلص .
كل حاجة ممكن تتعمل اتعملت .
كل فلوس اتطلبت جت .
كل خروجة اترتبت تمت .
كل حاجة ممكن تتطال اتطالت .
كل شىء اتطلب اتنفذ.
وآخر كل طريق منهم غربة ووحدة قاتلة !.

ثم غفى هذا العجوز امام بيته الذى انتهى من بناءه .. حالما بمنزل جميل والوان متعدده كتلك التى عند الجار ...
حالما بنومة هادئة دون ان تزعجه قطرات المطر او ان يتطاير سقفه الخشبى من هواء الشتاء ..
هذا البيت الذى ولد فيه فقيراً ثم عاش فيه بائسا لا يميز الاشياء حوله من تلك اللمبة الصفراء التى تبعث الكآبة على الجدران الطينية ..
غفى وقد بذل كل جهده من اجل البناء هذا الذى اخذ من عمره سنوات شقاء كى يبنيه ..
نام العجوز نومته الاخيرة امام بيت جديد لم يحتوى جسده النحيل ... غفى غفوته الاخيرة ثم طلبه القبر لينام مُعذباً او منعماً الى الابد ..
غفى دون ان يبيت ليلة فى تلك الالوان التى نسجها له خياله .

هو انتى ليه بعيدة كده ؟!
ومستحيلة بالشكل دا ؟!

سواء كنت كلباً او انساناً ،، عندما لا يكون لديك شىء لتقوله يجب ان تسكت .. ارتباط شرطى منطقى .
قاوم هذه الرغبة الملحة فى الحديث من اجل الحديث ... قاوم فكرة ان تكون مبتذلاً ،، قاوم محاولات لفت الانتباه ،، استجداء الاهتمام ،، البحث عن ذاتك فى عيون الاخرين ،، امتلىء بنفسك .. بأفكارك .. بحزنك .. بشريط ذكرياتك .. بفراغك حتى .. افعل اى شىء عدا ان تصدر عواء خاوياً .. فقاوم فكرة ان تعوى دون سبب .
ده كلام شخص اسمه عبد السلام بن رغبان .
عجبنى جدا لو كل واحد عمل كده هيبقى حاجة لطيفة ومش هينزعج ولا يزعج غيره .

خالد الراشد

من مدة صغننة كده حد لطيف كده وجميل انا بحترمه زعل جدا واتضايق انى وانا بكلمه عملتله بلوك علشان هو طلب كده !
بدون اى مقدمات كان معايا امبارح مثلا كويس ودلوقت جى يقولى متكلمنيش فل لحد كده .
نفس الشخص تانى يوم كان مفروض هكلمه اتصلت ويتنج يعنى شايف رقمى !
طب رد عليا ؟
لا
قبلها كنت بتصل كتير على غير عادتى رد عليا ؟
لا
طيب قبلها قعدت اسابيع اتصل رد عليا ؟
لا
طيب لما هو جه يكلمنى رديت عليه على طول ؟
اه
اتأخرت عنه ؟
لا
مكنتش زعلان فعلا ؟
صحيح
مكانش فارق معايا اى حاجة ضايقتنى منه عملها ؟
حصل
طيب نفس الشخص مردش عليا وكان عنده رسالة منى قفل الاكونت او رزعنى بلوك !
انا مش زعلان عادى بس كان لازم اقول الكلام ده حاسس انى منزعج ولازم احكى ..
عموما ..
بغض النظر عن ظروفى وبغض النظر عن الفترة الكئيبة والصعبة جدا عليا اللى بمر بيها حاليا عادى مش زعلان ..
مش لازم اقول فيا ايه ،، مش لازم احكى واشكى دايما .. انا شخص عنيد جدا على عكس كل كلمة بكتبها هنا عن سوء حظى او معاندة حاجات كتير ليا انا اخر حد ممكن يعلن انهزامه من تجربة او مشوار واخر واحد يستسلم فى سكة هو اختارها ،، مش هتكسف اقول انى خسرت ولا انهزمت .
بس ياريت نريح بعض نقول اللى فى قلوبنا ونمشى ،، انا غبت عن ناس فى عز احتياجها ليا ولما رجعت لقيت العتاب نازل عليا من حقهم لانى مكنتش جنبهم فى عز قرفهم فمش من حقى اكون جنبهم فى فرحهم .
مش لازم كل الناس تقول اللى فى حياتها علشان نعذر بعض الحياة مش حرب ولا ندية ولا غرور ولا عنجهية ..
الحياة مشاركة مفيش حاجة بتيجى قفش ولا بالعافية معلش يا جماعة حاولوا بس تشوفوا بعنيكم الاتنين مفيش حد صخر او جماد ممكن تلاقى حد بيخبى وجعه ومشاكله وحزنه وظروفه وكل شىء مضايقه ومعاك كويس متاخدش على انه دايما كده ،، فتش وراه شوف مشاكله واعذره واختار ياتفضل جنبه بشكل محترم وراقى ياتمشى بأدب .
لو بلوك كان اهانة ،، فعدم الرد وعدم احترام الشخص والميعاد اهانات .
ناس بتعديها وناس لا .
انا بعتبر الصدفة = ندم
لان الصدفة ممكن تعرفنا اننا اسأنا الظن فى شخص بشكل مبالغ فيه ،، ممكن لما نعرفه ندرك اننا خسرناه وانه مش بالسوء ده ..
الصدفة بتعرفنا فى الواقع اذا كنا اتسرعنا فى الحكم على الشخص الفلانى ده ولا لا ،، بتعرفنا حقيقى اذا كنا خسرناه بشكل ما ولا لا ..
متخلوش الصدف تأذى حد فيكم انا مبحبش الصدف بس ع الاقل بسيب مسافة تخلينى لو صدافت شخص ما ولقيته جميل عكس ظنى بسيب مسافة تخلى علاقتى بيه لطيفة .
انا حتى مش عارف اوصل اللى عايز اقوله او بيدور جوايا .
ايا كان يشهد ربنا على قلبى انا مش زعلان من حد ولا شايل من حد ولا فى قلبى ذرة حقد ولا كره ولا غل لاى شخص فى حياتى من فضل ربنا عليا ،، انا حتى لو حد غريب اساء ليا بقول هتلف الايام واثبتله انى مستاهلش حتى لو شخص قابلنى صدفة فى سفر .
فُل يعنى الموضوع محتاج شوية صبر وحبة عقل صغننين ..
مرة اخيرة انا هزعلك لو فيا حاجة بتوجعنى وانت بتقطم فيا هتعصب عليك .
هزعلك لو انت غبى .
هزعلك لو انا عايز افرحك وانت مش عايز تفرح .
هزعلك لو فاهم انك مُلم بكل شىء بيدور حواليك ومادونك مبيفهموش شىء .
ممكن ازعلك فى كل الاحوال بس صدقنى هصالحك فى اقرب فرصة ووقت بطريقتى ومش هتضايق لو مشيت بعدها .
ع الاقل اعملوا اللى عليكم حاولوا متزعلوش حد .
انا رغاى اوى فهسكت .

ما اصابك لم يكن ليخطئك وما اخطأك لم يكن ليصيبك .
النبى الكريم .
*اذا عرفت نفسك فلا يضرك ماقيل فيك .
*لاتكن طعاناً تنج من السنة الناس ، وكن رحيماً محبباً الى الناس.
*ارض بما قسمه الله تكن غنياً ، وتوكل على الله تكن قوياً .
سفيان الثورى
ــــــــــــــــــــ
حاجات لازم تبقى حاضرة دايما فى قلبك وعقلك .

ستمطر ام لن تمطر ؟؟!

احنا غرقانين فى نعم ربنا ،، اللى ميحسش بربنا فى النفس اللى بيتنفسه انسان غبى وضال ..

الابتلاء علشان تتأدب مش تتذل .. اتأدب فى الابتلاء يتخففلك فى الالم .

نجار
استورجى
نقاش
سمكرى عربيات
على الترتيب كان نفسى اطلع صنايعى فى حاجة من دول !
عليهم شوية قعدات عنب ،، قاعدة كده لطيفة وشغل بالمزاج ..
هنعمل ايه حظى طلعت من طبقة متوسطة ارستقراطية .
حرمونى من احلامى وطموحاتى الجميلة .
#اعترفات

اما آن لها ان تستقيم وتبتسم ؟!!

ستى اللى هى جدتى وانا صغير لما كنت اخد مصروف كتير مزيج من البريزة والشلن والريال وامى تمنع عنى الزيادة كنت بروحلها اقولها ياستى انا نفسى اجيب كذا وامى مش عايزة تدينى فلوس نفسى فيها اوى .. تقولى لا !
وبعد شوية تنادينى تقولى خد هات اللى نفسك فيه ياعالم بالحال محدش عارف ايه ممكن يحصل !
بعد شوية لما كبرت بقى اى حد يطلب منى شىء  ومعملوش احس بذنب واعاتب نفسى واخاف ليحصله حاجة  وهو نفسه فى الشىء ده ومعملتوش!
شوية وكان بينى وبين شخص ما خلاف ،، شافنى وقالى لما نقعد نتعاتب ونتحاسب بعدها بــ 5 دقايق كان مات قدامى !
زاد الموضوع عندى شويتين ان اى حاجة تنطلب منى بعملها طالما فى وسعى من غير تردد ...
بس انى ابقى جى من الشغل مفرهد وطالع عينى وفى اكل فى البيت واخويا يقولى عايز اكل بيتزا لو هتجيب هاكل ولو مش هتجيب خلاص واضطر انزل ادب مشوار ده اللى مفروض ميحصلش عيب يا اوس تعمل فيا كده لو حصل وجيت هنا لسبب ما فى اى وقت اعرف انى مكنتش عايز اكل اصلا بيتزا .

انا بائس ومحبط اكتر من فار اتحطله مصيدة فى مخزن صاحبه بيروح مرة فى الاسبوع .. بائس زيه لما دخل المصيدة وعدى يوم والتانى وبدأ ينهار وهو شايف كل حاجة حوالية براح ووجودة هو الضيق !
بائس زيه انه شايف اكل وشرب واصحابه برا بينطوا حواليه ،، بائس زيه وهو شايف انه بس لو خرج هيعرف يدبر اموره !
بائس زيه وهو مستنى صاحب المخزن يرجع ويقتله ويخلص احسن من حبسته وعذابه .
بائس زيه لانه غبى ساب البراح وحبس نفسه فى مخزن ضيق .

فى ناس اعرفها جالها قولون عصبى ومحسسين نفسهم انهم فى بلاء وهو سبب فى انزعاجهم !!
الشخص ده نفسه عمره مافكر انا ازاى كنت معاه لطيف وصبور فى مواقف كتير رغم ان حالتى اصعب منه !
عمره ما التمس ليا العذر لعصبيتى او حمقى او سخافتى رغم انه مثلا مثلا جرب جزء عندى !
ولما جيت اقوله ان فيا كذا وكذا فهم انى بشتكى !
كلامى كان بعيد بعد السما م الارض عن الشكوى كان توضيح .. بس فى عقليات بتفهم بمزاجها .
من ثانوى وعندى قولون عصبى وارتجاع مرىء بنسبة بسيطة وعادى ..
بعد الحادثة طلعت بغضروف والحمد لله عادى
دايما لو كنت متعصب بزيادة بيكون فيا حاجة بتوجعنى ولانى مبقولش ان حاجة بتوجعنى ومبحبش اتألم ولا اشوف فى عيون حد نظرة شفقة بكون عصبى بس بنسبة 90% اللى عندى ده مبيأثرش على علاقتى بالناس بتكون ظروفى زى الزفت وبتعامل كويس بكون قاعد قاعدة مش مريحة ضهرى وواجعنى وساكت علشان المكان ده فى ناس بتحب تقعد فيه او علشان مبوظش القاعدة بسكت ،، بكون مش قادر اتنفس من القولون وممكن اجامل واكل اكل بيتعبنى .
عادى مكنش ولا هيكون سبب فى انى ازعل حد منى واعمل فيلم واقول اصل ضهرى واصل قولونى ..
اللى عايز يعامل الناس كويس هيبقى كويس معاهم بأى شكل واى طريقة .
مشكلتى الوحيدة بس انى لما اكون مش فايق مبردش او برد بسخافة ببقى مصدع فعلا لدرجة ان اللى بيكلمنى بيفهم انى بستخف بيه .
الحمد لله دائما وابداً ،، الحمد لله الذى اخذ قليلاً واعطى كثيراً ..
الابتلاء مش علشان ربنا يذل العبد لا علشان يتأدب اذا احسن الشخص الادب مع ربنا احسن ربنا العطاء وخفف عنه الاحسان للناس نوع من الاحسان لربنا لانه بيغفر للعبد غلطه فى حقه ومبيغفرش غلط العبد فى العبد !!
سلامة كالونك ياكابتن منك ليه .!

وحدك ... محمود درويش

والتمس عذراً لمن طلب اغتيالك ذات يوم
لا لشىء ..
بل لأنك لم تمت يوم ارتطمت بنجمة .. وكتبت اولى الاغنيات بحبرها ....

تُنسى كأنك لم تكن .

ماهو اللاشىء هذا ؟!

فى ناس بتدخل حياتى وبتخرج بيبقى كل همى وكل وجعى انى عارف انهم احسن منى وهيفضلوا احسن منى !
مش من باب كره الخير ليهم او استكتاره لا من باب انى عايز لما اقابلهم اعرفهم انى حد كويس ووصلت لمراحل كويسة فى حياتى بس للاسف هفضل اقل من ناس كتير دايما ،، تقريبا انا شخص مختل عقليا او مصاب بالبارانويا او اهبل انا شخصيا محتار فيا .
بيزعجنى ان الشخص ده هينسانى ويعيش حياة مستقلة انا معرفش عنها حاجة ،، هيعيش مع ناس تانية وشخص تانى .!
مختل مختل .

هى ماشية كده ..
اقع مرة اقوم مرة
افرح مرة احزن مرة
اتبسط مرة اتنكد مرة
اغلط مرة وابقى صح مرة
يتداس عليا مرة
يتقسى عليا مرة
يتحط عليا مرة
خلونى لحالى وخلوها ماشية كده .
شكرا لكل حاجة ساعدتنى ووقفت جنبى .
شكرا لكل حاجة خذلتنى وسابتنى رغم احتياجى.
شكرا .

اول امر اسهل امر ،، دائما وابداً ..

اول حاجة تتطلب تتنفذ وهتعرف تنفذها حتى لو صعبة... جدال = مشاكل وتفاصيل مملة وصعوبة وفشل .

حتى لو صعبة هتعدى .

اللهم حلم ،، اللهم هدف .

شفت حد شبه شخصية بحبها ،، رغم ان اللى شفتها صغيرة الا انى كنت بحسن اليها بطريقة مبالغ فيها انا نفسى مستغربها !
لمجرد بس انها شبه حد عرفته فى يوم .
الحب دايما ينتج حب .

شوية عنى

طيب انا مش حزين ولا بائس ولا يائس وغالبا وكتير جدا اى كلام بقوله هنا بيكون من واقع خيالى اللهم الا انى سىء الحظ فعلا ومتمرمط فى حياتى والناس بتعد الغلط ليا وبس وبينسوا اى حاجة حلوة ..
مبسمعش اغانى حزينة ولا اصلا مهتم ومعرفش معظم المغنيين وعمرى ماشفت فيلم او مسلسل الا بعض حلقات حديث الصباح والمساء يعنى مش متأثر بحد فى اللاوعى وجى اطلعه هنا ..
انا مش نكدى خالص خالص خالص بهزر كتير جدا وبضحك ومسئول العلاقات العامة فى البيت ومع اصحابى اى لمة واى هيصة وزمبليطة بكون انا مرتبها ومجهز اى حاجة تضيف اجواء البهجة والسعادة على الموجودين ..
كسبت كتير وحاجات كتير جدا من فضل ربنا عليا
خسرت حاجات برده نوع من التهذيب لنفسى ومقاومتها ،، ربنا اذا ابتلى الانسان بيكون علشان يأدبه اذا احسن العبد الادب احسن ربنا العطاء ..
دايما فى حياتى اول امر اسهل امر ،، اول قرار اسهل قرار ،، اول فكرة اسهل فكرة حتى لو كان فى جوهرها صعبة وفيها مشاكل كتير ....  "بتعدى" ،، حطيت هدف هوصله الا اذا كان الهدف ده مش عايزنى او بيبعدنى عنه .
حقيقى مبركزش مع حد لدرجة ان مرة واحدة حدفت مية من البلكونة لبستها كلها واتغرقت طب والله ما بصيت فوقى اتعصبت بس بعدها بشوية نسيت وسامحتها ،، ظالم او مظلوم بنام مسامح كل الناس ولا فى قلبى ذرة حقد او غل او كره لحد حتى لو بيكرهنى ..
اوقات كتير مببقاش فاهم وتايه فبسكت والناس تفكرنى مركز وفاهم ومش عايز اتكلم فى تفاصيل فعليا ببقى مش فايق لدرجة ان لو بيكلمنى فى كارثة بشوفها عادى هنلاقى حل اكيد !
انا سودوى شوية بينى وبين نفسى .
قلوق جدا جدا جدا جدا من هنا للصبح ،، لو مفروض اروح مشوار وحد راح مكانى افضل اطمن عليه لحد مايرجع بخاف ليحصله حاجة ،، المتبرع دائما وابدا بأى مهمة فى حد مكسل عنها او فيها احتمال وحش  بقعد افكر دايما ممكن يحصل ايه لفلان لو عمل كذا وممكن فلان يأذى نفسه لو عمل كذا وبحس بتقل فى قلبى من كتر مابقلق .
بيقولوا انى صريح ومبخافش واللى مضايقنى بقوله فى وش اى حد وبرد ومبسكتش بس مبغلطش كتير .
بيقولوا انى عصبى جدا بس طيب ومتسامح وحنين !!
دماغى دايما مكركبة لدرجة انى من قريب كنت واقف على شريط القطر وهو جى والناس بتنده ومكنتش سامع خالص حسيت بحاجة داخلة عليا رجعت خطوتين وهو عدى ،، بعدها عرفت ان كان فى ناس بتصوت وتنده وانا كنت فى ملكوت تانى البلالة يعنى ..
اعذروا الناس اللى القطر بياخدها فعلا مبيبقوش سامعين ولا شايفين الا اذا اراد ربنا ،، الغريبة ان واحد قالى انت بارد شكلك مش مخضوض !!
باخد بالى وبركز اوى فى تفاصيل ممكن تبسط حد زى انى مثلا ممكن اقوم فى الشتا اشغل السخان علشان اللى يصحى الصبح يلاقى مية سخنة وميتضايقش لو ملقاش !!
اعرف حد بيحب فاكهة معينة تلزق فى ايدى دايما وانا رايح وجى عليه ..
بس مبركزش مع كلام كتير وافعال كتير طب والله العظيم غصب عنى ^^ فى ناس ببقى نفسى اركز معاها ومبعرفش عادى يكش يولعوا !
لو زعلتك وقلت حاجة تزعلك سيبنى 10 دقايق هتلاقينى جى اصالحك ومتضايق جدا منى وحاسس بتأنيب ضمير جامد اه والله .
اخيراً يعنى انا مش كئيب والله زى ما ناس فاهمة عنى .
بس خلاص.

هل تشبهنى ؟!

سلام على قلوبنا ،، سلام عليها ماذاقت يوماً سعادة لكنها ادركت مبكراً طريق الشقاء ..
سلام علينا لم نكن نملك شيئاً لانفسنا ،، سلام على ارواحنا لم تترك الجمال لتعانق القبح بل فُرض علينا !
سلام على القدر لم نكن نملك مابه حتى نغيره ..
سلام علينا اردنا ان نكون مثلكم لكننا مُسيرون فى اقدارنا وافعالنا ..
لم اكن املك شىء لنفسى ،، ولا املك شىء لــ ان لــ اصل الى بعض القلوب .
قلوب اكثر علماً
اكثر مالاً
اكثر مكانة
اكثر جمالاً .
سلام علينا وعلى تلك الحياة الفقيرة التى لا تدركها وتتقبلها بعض القلوب .
سلام على قلوبنا تهب ما تملك ومالا تملك .. سلام على الحب فينا .

كانت حارة صغيرة تضم ابناء الجيران كلهم ،، هذا المكان الذى لا يسعنى الان ان امشى به وفى يدى صديقاً !

قديما كانت قريتنا تملك روح الطيبة روح البساطة هذا الجيل الذى رحل ولم يبق منه شيئا كان اكثر جمالاً ..

اوراق الذرة التى كانت تتساقط من اسطح البيوت الطينية فى صيف لطيف .. وهذا الهواء الخفيف الذى يترك الارض ناعمة ..

العاب الاطفال التى اختفت الان !

مشاجراتنا واحزابنا !

جدتى التى كنت اراها الدفىء فى الشتاء .. تجمعها مع الجيران على باب احد المنازل حكاياتهم التى لا حصر لها ،، بساطة القول والفعل .. جدتى التى كانت تتربع لاضع رأسى على ارجلها وسط هؤلاء الكبار حتى اذا توغل الليل اسدلت شالها على جسدى الصغير كى لا يصيبنى البرد ،، كُن هُن التاريخ كانوا هن البيوت والدفىء .. كانوا هن المصابيح التى تضيىء البيوت والشوارع !

عن تلك الجارة التى كانت تنادينى فتعطينى مثلما لابنائها ارغفة العيش والجبن !

عن هؤلاء الكرماء ،، عن جيل تستحى منه البساطة ،، عن هؤلاء الذى رحلوا واصبحوا رماداً ،، عن اصواتهم التى استبدلناها باصوات السيارات رحلوا وتركوا لنا ضجيج الآلات !

عن جيل اُقسم ان لون الشمس تغير بعد رحيلة .. رحلوا وتركوا لنا اجيال مائعة لا لون له ولا طعم !

رحلوا ورحلت معهم بيوتهم الطينية ،، رحلت معهم دوابهم ،، رحلوا وقد فقدت الارض ملامحها فلم تعد خضراء كما كانت !

رحلوا وايضا رحلت قريتهم معهم لم تعد قرية ،، لم تعد تملك من البساطة والحب شىء ..

رحلوا واحتل القبح كل شىء وكل شبر فيها ...

فــ الى هؤلاء الرائعون البسطاء انتمى  ،، منهم تمنيت ان اكون ،، فى زمانهم تمنيت ان اولد .

فما اقبح هذا الزمان .!

فى ناس بعرفها وبحب اقرب ليها وبحب وجودهم بعد شوية الاشخاص دول ممكن يتغيروا او يحسوا بقيمتهم او الغرور ياخدهم لما يلاقوا كذا حد شايفهم كويسين ويمدح فيهم ،، بيشوفوا نفسهم الافضل دايما وانهم على طول يستحقوا احسن مما هم عليه ويستحقوا يكونوا لاشخاص احسن من اى حد يعرفهم .
الناس دول بعد ما ببعد عنهم برجع تانى الطف الجو بينى وبينهم مش لشىء غير لانى هثبتله فى يوم انى افضل منه وانه كان ظالمنى وشايفنى غلط وحاططنى فى خانة مش بتاعتى ..
بستنى يوم يتأكد انى الافضل وان انا اللى استاهل الافضل مش هو علشان اكسر غروره وانانيته ويعرف انه سطحى وغبى ..
فى ناس مفكرة انهم خلاص  بعض الناس عندهم زى الحشرات وانهم يستحقوا كل حاجة حلوة وهياخدوها غصب عن اى حد !
انا ثقتى الوحيدة فى نفسى ان اى حد عرفته لو اختار يكمل معايا كنت هكونله افضل صديق وافضل حبيب واخ ..
ثقتى فى انى كنت هبقى حقيقى اكتر شخص بالنسباله جدع وقريب وبيهتم وبيحتوى ،، ثقتى الوحيدة هى ان اللى هيقرب منى ويعرفنى بجد هيدرك انى افضل واحد شافه فى حياته ،، ايوة بغلط بس مستحيل اعمل حاجة باى شكل لاى شخص اعرفه شخصيا تزعجه حتى او تضايقه .
الناس اللى شايفه نفسها حلوة ولطيفة _ حقيقة انا افضل منكم .

الحياة بسيطة ابسط من انى اركز مع مين قال ايه ومين غلط فى حقى وليه !
ابسط من انى افصص وادقق فى افعال الناس واشكالهم وتفاصيل حياتهم
ورغم انى شخص منطوى ومبركزش ابداً مع كل الناس مش مرتاح زى ما البعض فاهم ان راحتك فى تكبير دماغك فعليا .!

والعيد سيُصبح عيداً يوم تُنثر دمائنا حباً وشرفاً على جدرانك يا اقصى ..
والعيد سيكون عيداً يوم يداوى جُرحك يا سورية ..
والعيد سيكون عيداً يوم اجدك يا وطنى .

احترام النفسيات ..
بكره البقر..
بغلط وغلط وتجاوزت وزعلت ناس كتير منى ..
انما اقسم ان اى شخص وقف قدامى كنت بحترم نفسيته جدا اى حد عاملته فى الواقع عمره ما يطلب منى شىء واقوله لا ..
الكلام اللى ملوش لزوم يتقال الكلام اللى بيوجع الكلام اللى يضايق الكلام اللى يفصل الشخص ويغير مزاجه للأسوأ ملوش لزوم ..
مرة فى حد تافه جدا فى شغلى قالى "اخلص مش فاضيلك" كنت ممكن بسهولة اطرقعله واخلى الكلب ليه قيمة عنه سكت وقلت ملوش لزوم .. فى صنف قرود من البشر مش لازم نهتم بيهم بس لازم فى المجمل نفهم ان الكلام بيوجع ويضايق ..
احترام النفسيات والعقول شىء راقى جدا وجميل .. حتى لو فى مواقف غبية ملكش دعوة طالما مش شىء بيأذيك تسكت ..
احترام الرغبات حلو
حد عايز يركب عربيتك علشان حتى ياخى يترسم ويتنك ايه الكارثة اللى ممكن تحصل لو ركبها ؟
ليه متحترمش رغبته ونفسيته وتعمله اللى نفسه فيه ؟
ليه ببساطة بنعمل حاجات تضايق وتفقع ؟
ليه فى كلام بيوجع وملوش لزوم يتقال ليه تسيب ندوب فى قلبى نحيتك مبتتمحيش ؟
انا معرفش فى كام شخص بيعدى من هنا ويشوف كلامى ايا كان ..
لو سمحت من فضلك خد بالك من كلامك ،، غالبا سكوتك هيكون مفيد لو ناوى تقول كلام يوجع مش هتستفيد حاجة اصلا لو عكننت مزاج شخص او قلت كلام يوجعه ..
حتى لو كلامك بعنف بيكون لمصلحة الطرف التانى وخوف عليه اتكلم براحة اتكلم بعقل بلاش الكلام اللى ملوش لزمة بلاش الكلام اللى يوجع بلاش الكلام اللى يقرف بلاش تطلق احكام بلاش توصف حد بوصف مش فيه بلاش تركز مع الناس علشان متحتاجش تقول كلام يضايق ..
احترام رغبة الشخص حلوة
احترم النفسيات جميل
احترام وتنفيذ طلبات للناس حتى لو عجيبة شىء راقى طالما فى ايدك تعملها .
الكلام ليه وقع قوى على النفوس والقلوب الافعال اشد تأثير على النفوس والقلوب والاجساد .
حافظوا على النفوس والارواح بالكلام .
انا مش قادر اوصل اوى اللى اقصده يعنى بعد ماقريت الكلام ده تانى لقيته قال 40% من اللى عايز اقوله بس مش عارف اقول اللى اقصده بالكلام .. مش مهم ادينى ارتحت شوية .
كده فل ..
سلام عليكم .

احنا موجودين هنا ليه ؟
علشان النفاق ؟
علشان ناس كتير تبقى حوالينا وتقعد تقولنا اد ايه مبهورين بينا كعقليات !
ليه بنظهر اجمل ما فينا هنا ؟ ليه بنتجمل ؟
ليه مثلا كل النوايا مصحوبة بنوايا اوسخ مستخبية فى الاعجاب بالشىء او الشخص ؟
ليه لما نشوف شىء جميل ويعجبنا منقولش انه جميل لكوننا شفناه كده مش جميل علشان نحك وننحنح لصاحب الابداع ؟!!
انا مش بتكلم عن نفسى انا بتكلم عن كمية محن ونفاق وهبل وهطل وناس فرحانة ان بيجيلها 3000 لايك ومعجبات ومعجبين قلت قبل كده انه شىء حلو ... بس احنا ناس مصطنعة اوى ومنافقين ..
فى النهاية كلنا هنطلع بشخص واحد يكمل معانا ابذل كل طاقتك فى ان الشخص ده يكون الشخص الصح .
بس خلاص .

كان نفسى !

كان نفسى اضمك و بــ قوة

اضمك انتى مش هوا ..

كــ ا ن نــ فــ ســ ي !

تتر البداية بتاع مسلسل حديث الصباح والمساء غالبا وتقريباً وحقيقة بيلخص الحياة كلها ..
او المسلسل ككل بيخلص الحياة وتغيراتها وتقلباتها وتغيير الاجيال والافكار والاهتمامات والثقافة والموروثات والعنب العنب العنب !!
انا عمرى ماشفت فيلم عربى ولا مسلسل ولا اصلا مهتم ومعرفش معظم الممثلين والمغنيين ورغم انى مبهور بالمسلسل ده عمرى ما شفته كامل !!
ــــــــــــــــــــــــ

لحظة ميلاد الفرح كان فى حبيب رايح !
وفوق طريق الايام تجرى الحياة مشاوير
ـــــــــــــــــــــــــــــــ

الصبح طفل برىء ومساه يبان تجاعيد !
ونشوف ملامح الزمن متعادة فى المواليد
 واحنا البشر كلنا اعمار ورق بيطير !
دايرة تدور بالبشر ويا الزمان بتفوت
دمعة على اللى مضى ودمعة فرح للجاى
ياحى طول مانت حى مسيرة ييجى الدور
دى حكاية متكررة من يوم ولادة الضى !!!
ياللى انت عايش حياة بصلها تلقاها
سبحتها لو تنفرط بالعمر ما نشوفهاش
ولا شىء يعطر حياتنا يمد فى مداها
غير سيرة عاشت هنا اكتر صاحبها ماعاش

امبارح زى دلوقتى كنت سامع صوت شخص .. الى حد ما سعيد ومبسوط وليه اصحاب لطاف وحلوين ..
معندوش اى مشكلة صحية ،، يمكن فى التوقيت ده دخل بيته قعد مع اولاده ومفيش فى نيته اى حاجة ..
الشخص ده دلوقتى بايت فى القبر ... بس خلاص .

فليأت موتنا لــ نُلقى الحمل ثم نستريح .. ثم يستقيم الطريق ..
فليأت كى يرحل الوجع ..
فليأت ليُمحى اثار الشقاء ..
كى يُزيل ملامح الزمن .. كى يزيل ملل الايام والاوقات ..
فليأت لنعلم من نحن واين كنا ؟!
فليأت حاملاً جنة او ناراً .. فقط فليأت كى نستريح ..
فليأت لاخوف منه ولا عليه فإن قدومه الانتهاء فإنه الفناء !
لكن الموت خَالد ،، لا يمرض ولا يموت .!
فياللسخرية !

كان يجرى مسرعاً منهكا علامات الرعب تعتلى وجهه المشوه بالفقر ... باليأس !
قد زاد وزنه مرضاً !
يجرى ليلحق بالباص الذى يسبقه بخطوات حتى اذا فاته لم يذهب الى عمله !
يجرى ليتجنب الوجع .. من اجل بعض الجنيهات ..
تاركاً زوجة ترك الفقر فى وجهها ندوب وطفلا يبكى أبى لا ترحل ابق معى ..
زوجة قد فاض بها الكيل لم ترى وجه السعادة من قسوة زوجها لم ترى معالم البلد التى تعيش بها رغم ان هناك من يأتى من آخر الكون ليراها ويستمتع بها ..
يجرى بائساً ..
ليجنى بعض الجنيهات .. يجرى خوفاً من صاحب العمل .. يجرى وجعاً .
يجرى ليلحق بدائرته التى لا تنتهى ..
رُغم انه الاول فى السباق يجرى خاسراً لم ولن يترك علامة فى هذا الكون لم يذق طعم السعادة الا لساعات وباقيها مُزيفة ..
لن يترك الا ابناء بائسين يكملون مسيرته فى ارجائك يابلادى .. تباً لك .. تباً لنا نحن الآخرون .
يجرى خائفاً
 حزيناً
بائساً
مُرهق الروح والجسد ..
ليلحق بالموت الذى ينتظره فى آخر الطريق .