التعامل الأول ، الانطباع الأول  ، الفكرة الأولى غالبا ما بتتغيرش وده شئ مش عادل.
في ناس بتفضل مكانها تنساب سنين ونرجع نلاقيهم نفس الفكر نفس الاسلوب نفس العقلية ما اتغيرتش مللي واحد حتى حياتهم واقفة عند النقطة دي .
في ناس كل يوم يعدي تتغير في ناس ممكن تتبدل بالكامل وبعد سنين نشوفهم نشك هل هم دول ولا حد بدلهم!؟
الحقيقة اني من الناس اللي سابت ذكريات وحشة جدا لناس تعرفني غالبا في منهم هنا 3 أو 4 معرفش هم لسة بيدخلوا هنا ولا لأ اعتقد 5 سنين كافيين لاننا كلنا نكون اتغيرنا ، انا اتصرفت تصرفات مخزية وبطرق غبية جدا غالبا لو الأمور دي اتكررت دلوقتي هعرف اتعامل معاها كويس من غير ما اسيب أثر رغم اني ساعتها ماكنتش اعرف اني بعك يعني...
يمكن اللي عرفني شخصيا هو اللي يقدر يحكم عليا من كام سنة ودلوقتي ..  الوقت كفيل انه يغير فكر وشخص وطريقة بالكامل ، الكلام ده بقوله مش مبرر لأ بقوله علشان في ناس دايما تستحق فرصة تانية وانا شخصيا مابحبش يكون في عداء بيني وبين حد وما بحبش اخسر حد وبفَضل دايما اني اشوف شخص كان بينا مواقف اني أقف اطمن على حاله واطمن عليه أجمل من أننا نكون متخاصمين..
انا ما بقولش اني استحق فرصة تانية انا بس حابب أعتذر لكل حد اتضايق مني أو اتأذي بسببي أو انا كنت درس قاسي له أو اتصدم مني في شيء  الناس دي فات وقت طويل جدا جدا على معرفتي بيهم  ومش عارف هم هيشوفوا الكلام ده ولا لأ لكني اتمنى يوصل لهم واتمنى يتفهموا ويسامحوني.