5/27
عارفة يا اسمك ايه ؟
انا كنت ناوى مكتبش ليكى تانى بس انا مضطر لان مع اول موقف صعب يحصلى بفتكرك وابتسم ...
اول نبضة فى قلبى بعد ما بفكر فيكى بتكون نبضة فرح وسعادة وحب .
انا قاعد النهاردة فى مكان بعيد وبما انى بحب العزلة فأنا الى حد ما مبسوط ! حتى لو المكان كله حشرات غريبة وتعابين مستخبية ..
الوصف الوحيد للمكان اللى انا فيه دلوقت سور باطنه فيه الرحمة وظاهرة من قبله العذاب !!!
من برة فى بيوت وناس عايشة انا مش بحسدهم اوى لان المكان اصلا مش حلو .. ومن نحيتى سور طويل وشجر غريب وهيش وحاجات طالعة كتير فى الارض وزبالة عارفة زى خرابة كده بس لازم حد يقعد فيها وكنت انا كعادتى سعيد الحظ !
انا مش مستسلم علشانك ^ـ^
انا هتبسط كل ما افكر بس انى هكون يوم معاكى واشوفك ...
_ الجو قافل والناموس هنا زى الرمل وحشرات اول مرة فى حياتى اشوفها وبلاش اقولك هنام فين ..

* دلوقت عدى اول ساعتين ومفروض انام علشان هصحى كمان ساعتين اقف تانى !
مش جايلى نوم ! ثم انى هنام ازاى هنا اصلا .!؟
مش مهم ... عارفة انا كنت بقول انى لازم اعقل بقى وكبتر خلاص .. بس لما تبقى معايا تقريبا هيبقى فى مرحلة جديدة من الجنان ..
اوقات مش طايق نفسى واوقات عاقل وكتير مجنون ...
انا عارفك من قبل ما اشوفك ومش عارف ليه بحبك كل الحب ده ولما اشوفك هيزيد اكتر .. مش هيكون ليا غيرك طبيعى يعنى ..
هو ممكن يكون اللى بكتبه ليكى ده فراغ ؟؟!!
لست ادرى بس معتقدش كان عندى فرص كتيرة اسد بيها الفراغ ده ... بس انا عايزك انتى اللى هتكملى حياتك معايا ...
بقعد افكر لما اشوفك هتكون حياتنا عاملة ازاى اكيد هتبقى جميلة بوجودك .. انا بكتبلك كده بعفوية مش برتب كلام ومفيش كلام مقصود ...
ممكن تلاقيه ملوش علاقة ببعضه بس عادى يعنى وحشتنى وخلاص ^ـ^
هبقى ابعتلك جوابات سيبك من الموبايلات والحاجات الغبية دى ...
مستنيكى يا مجهولة ...
هطلع عينك بس مش هتنامى زعلانة ابدا ...
الجو حر نار وممعيش حاجة خالص تسلينى واخدين موبايلى !!
مش مهم ...
وحشتينى ...