شكراً لشخصيات رآئعة عرفتها فعلا بتبان فى مواقف صعبة ...

يااااااااااااه انا استاهل اسمع كلام مبعرفش اتخلص منه بسهولة بجد استاهل انى بعرف شخصيات بالحقارة دى .

الاحلام بداية الفشل ،، الاحلام الكبيرة فشخ اللى مش هتحقق بتتعب وتبقى زى الشوكة فى الحلق !
الرضا بالموجود افضل ولما يتفتح باب اكبر بتبقى الفرحة اكبر واحسن ...
لازم ارضى بالموجود واعيش الواقع حتى لو هيكون غصب عنى اعيش زيى زى اى حد .
انا مش احسن من حد ومحدش احسن منى كانسان بس فى ناس كتير احسن منى فى حاجات كتير مختلفة ...
ربنا قدر الارزاق وفضل بعض الناس على بعض والارزاق دى مش فلوس بس .
#حالة يأس .

والناس مش عايزة تسلك !!!

آة والله !

النهاردة وانا راجع من شغلى عرفت اد ايه احنا شعب عبيد وبيحب الذل ... كله بيجرى زى الكلب يلحق مواصلة قبل الحظر ...
المترو علبة سردين مواقف الميكروباص زحمة فشخ .. كلاب عبيد عيش جبان تموت مستور فعلا .
تلاقى صوت الكلب منهم اد كده ويقلب فرخة لو فاضل نص ساعة ع الحظر يووولول زى النسوان للسواق علشان يركب !
جاله رئيس يحترمه يديله حقه ويعمله قانون كمان ان محدش يرهبك ولا تتحجز فى قسم شرطة بدون ماتعرف تهمتك  وبرده مش عاجبه ،، الجيش يديله على قفاه وزى العسل على قلبه !  اجرى ياد هيتعملنا بلوك ^ـ^
قالولنا عليهم الخرفان وهم البقر فى زريبة ...

ويوم مافكرت اغير فوادفون الحقيرة .. موبينيل القذرة ابتدت بداية جامدة ....
اكتر من نص ساعة مستنى اكلم خدمة العملاء !!!
#وساخة

دائما تُعطى المرأة بدافع الحب ... ويُعطى الرجل بدافع الاحتياج والمصلحة ....!

الحل علشان البلد دى تنضف ... ثورة جديدة  معاها ...
اعدام النخبة السياسية ...
اعدام الاعلاميين ...
اعدام الشخصيات اللى بيقولوا عليها رموز وطنية ..
اعدام على جمعة والطيب وامثالة ...
اعدام بعض قيادات الاخوان لانهم سبب فى فشل البلد ...
اعدام بعض قيادات الجيش ...
ونبتدى على نضيف ^ـ^

متسمعش مغنى معين او موسيقى معينة لكون فى حد بيفهم او مثقف او بتحبه بيسمعها ...
لا تقرأ شىء علشان فى عقلية بتحترمها قرأته وقالت انه كويس ....
متفكرش بشكل معين وتحط اطار لاسلوبك علشان تبقى متساوى مع بعض الاشخاص اللى بتحترم عقليتهم ...
متتابعش صفحات معينة لان فيها نص اصحابك المفكرين واللى بتحبهم ....
اكيد ليك رأى مختلف ،، فكر مختلف ،، اسلوب مختلف ،، ذوق مختلف فياريت متبقاش متخلف .

لما كتبت تاريخ ميلادى 1916 كل اللى يدخل البروفايل بتاعى يسئلنى عليه ويستغرب دلوقت بقابل بروفايلات كتير تواريخها كده 1905 ،، 1923 وهكذا اكتشفت حتى ان فى ناس عندى كتباها هى الفكرة لمت وبقت موضة ولا انا اللى جيت متأخر ؟؟؟!!

الرجل الذى يتعدى على مقدسات انثى لا يستحق ان يسمى رجل ... بل حقير .

اتى الوداع ليحضر اللحظات الاخيرة بينى وبينها .. كان اللقاء بارداً هذه المرة حاولت انا ان انهيه لئلا يطول  ...

ربما لشىء فى نفسى وهى الاخرى كانت سيئة المزاج ،، داعبتها مبتسماً بكلماتى وقلبى داخلى يوبخنى ....

كنت مرهق الجسد   مشتت الذهن وكانت اطرافها باردة كالثلج ...

جلسنا نتحدث احاول ان اخفى مابداخلى ... شىء ما داخلى يريد ان يبكى لانها العمر واللحظات لا فائدة من حياتى دونها ..

وايضا كانت رغبتها فى الرحيل على امل اللقاء يوماً ... 

تركت لها بعض الكلمات من اجلها ثم حضر الرحيل مبتسماً على غير عادته يخفى حزنه هو الاخر كأنه  لايريد لهذا الحب ان ينتهى وقف ينتظر ان ننتهى من حديثنا فى ادب ... اخبرتها انها ليست ملك لها وحدها فقط كونى بخير من اجلى ثم امسك الرحيل يدى مبتسماً ..

همس فى اذنى لا تحزن ستلتقيها يوما ما  واخبره اتمنى  ان يجمعنى القدر بها اتمنى ...!

انا انسان مستهتر اصلا ... ومكنش وقت بلوكات خالص .
# مستقبلى يضيع :( 

ملكووووووت ...

نجيب سرور بيتهيئلى لما كتب الاميات ارتاح راحة ابدية !!
الراحة فى وجهة نظرى انى مفقوع من الواد طاهر اللى شبه السحلية ده انا ممكن اجيب اكياس بلاستيك واولعها وانقط على جسمه وبكده هحس انى كنت كتلة نار ووقعت فى برميل تلج ^ـ^ رغم ان الفكرة شريرة الا انى مش هرتاح الا كده ....
الشعور بالراحة الانتقامية شىء ممتمع خصوصا ولو حد فعلا بتكرهه ومش بتحبه بتكون فى قمة المتعة لما تعذبه او تهزقه !
نجيب سرور كتب الاميات وعلى ما اظن ارتاح لملايين السنين .
# نفسى ارتاح بقى

ومين فيكى يا "مسر " منزلش وشال علمك فى ايده واتصور جنب دبابة وهو رافع صوباعين كدهو /.\
الا انا تصورتش رغم انى شفت دبابات كتير ^ـ^ . انا كل ذكرياتى وانا مزنوق فى محطة السادات وحاسس انها النهاية ...
بكره الزحمة والاماكن الضيقة بكره حتى لو اتحطيت فى مكان واســــــــــع بس اتقفل عليا بوابة بحس انى مش قادر اتنفس !!
كنت هروح فداكى يامسر الحمد لله محصلش ومش هيحصل ومش هتصور برده جنب دبابة .
# ذكرى نطت فى دماغى

حلم ....ْ~

انا مبسوط ^ـ^
وعموما انا لسة ياما هقابل شخصيات مختلفة او متخلفة ... المهم انهم يبقوا واثقين انهم صح وانى غلط بمساعدتى ^ـ^
فل اوى بعتبر هزيمتى فى نظرهم انتصار ليا  اللى يكذب ميستحقش انه يعرف !!!
#عبط بعيد عنكم
# النفاق والكذب

والمصحف ياجيفارا انت لو عايش وشفت حال "الثوريين" المصريين لكنت جبت عربية ترمس ووقفت تبيع فى التحرير وتقولهم يلعن ابو الثوار علشان خاطركم ياولاد المرة .... كل عيل يقعدلى فى قهاوى وسط البلد بقى ثورى وكل عيل مسك البت السحلية بتاعته وقعدوا بقى يفتولنا عن قصصهم فى شوارع العاصمة ... الثورى شال وتربية دقن وشعر ولو لحق يطلع على التلفزيون فى مصر بس ..
لو حد فيهم قرأ عن جيفارا بس هيعرف انه جحش ... جيفارا كان انسان مش حيوان .

بقابل اكتر من بروفايل لبنت ضايفة نص شباب مصر ونص شباب مصر يدخل يقولها شكرا على قبول الصداقة !!
وكمان ممكن تلاقى شاب من دول سايب رقمه وبيقولها ده رقمى !! تدخل صفحته تلاقيها كلها صور جنس ووسط الصور دى صورة تقولك سورة يس يمنع كذا قراءة الفاتحة يمنع كذا !! ببقى نفسى اعمل حركة وسخة بمناخيرى يسمعها اللى فى اخر الكون .
يعنى كلنا بنحس برغبة وشهوة ودى طبيعتنا كبشر بس اللى مش طبيعى انى معرفش احدد هو انا عايز اكون قليل الادب ولا مؤدب ؟؟
ملتزم ولا مش ملتزم ؟؟ بفهم ولا حمار مبفهمش ومش ناوى افهم !!
العقليات دى كتير وعايشة وسطنا لافى خجل ولا فى عقل  او فكر سواء بنت او ولد،، البنت او الولد لما يكون صايع بس متعلم وفاهم ومثقف مهما تدنت اخلاقه ففى امل انه يوم يبقى كويس بيعرف ينصت ويحكم ويقرر لانه صاحب فكر و فاهم الكارثة فى البقر اللى ضايعيين فكريا وثقافيا واخلاقيا ودول اكتر .

لو ان لى وطن اموت لاجله ،، لو ان لى ارض انثر قطرات دمى فداء لها لكنت اكثر سعادة ..!!
فبلادى ليست وطنى وارضها ليست ارضى ... لو انى تعلقت بوطنى الكبير لن يحملنى واسقط ...
لو صرخت لن يسمعنى وطنى ،، لو ظُلمت لن ينصفنى وطنى  ،، لو قُتلت لن يقتص لى وطنى ..!!
لو مرضت لن يداوينى وطنى ،، لو تعبت لن يريحنى وطنى ،، لو اجتهدت لن يكافئنى وطنى ..!!
لو توجعت لن يخفف عنى وطنى ،، آه لو ان لى وطنى يحبنى لو ان لى وطن لايقتلنى لكنت اكثر سعادة ... آه يابلادى لو انك تستحقين الحب لــ تمنيت  اموت الف مرة واحيا لاموت من اجلك مرة اخرى ... لــ تمنيت ان اموت فدائك ...
 انا لا اعترف ان لى وطن لاننى وان اعترفت سيقتلنى ..ولن اسامحه .
ـــــــــــــــــــــــــــــــــــــــــــــــــــــــــــــــــــــــ
وطنى ليست الارض اينما اجد سعادتى سيكون وطنى ،، اينما احقق احلامى سيكون وطنى ،، على اى ارض احيا عليها سعيدا ستكون وطنى ،، على اى ارض تعطينى حقى ستكون وطنى ،، على ارض لا تظلمنى ستكون وطنى ،، على اى ارض تحتوينى ستكون وطنى ... على اى ارض تقدس دمى ستكون وطنى وسيكون ولائى .... فعذراً يابلادى او لست آسفاً انا لا احبك ولست وطنى .
وطنى داخلك يابلادى  فتاة اعشقها يوما ما سأتركها رغما عنى وعنها ... وحينها اتركك .

اما آن لهذا الكون ان يحترق ؟؟؟!! اما آن له ان ينفجر بنا ؟؟!!

نفسى فى مرة اصحى اسمع خبر حلو :( 
كل يوم اصحى على دم فى مصر او مذبحة فى سوريا ... سببها البشر !!
سببها الانسان !!
حسبى الله

 

كل النهايات ليست جميلة ،، ليست مثالية ... لكن ربما يرحل احدهم  ويترك السعادة للاخرين ...!
ربما يصنعها لهم وهم لايشعرون ....

ما الفيس بوك الا مسرح كــــبـــــــــــيــــــــر ....
# اه والله

انا اكتفيت خلاص وفهمت انا كنت بعمل ايه ،، ممكن اكون بصيت من نحية واحدة ممكن اكون كنت انانى فعلا ! ....
انا ممكن اتخلى عن ناس مقابل شىء بسيط وهم برده ممكن يتخلوا عنى مقابل شىء بسيط !!
الاعتياد على الوجود دى كل الحكاية طب واخرتها ؟؟!!!
انسى مالها الوحدة ؟ مفيش اجمل منها .

هو الواحد ممكن يجيله شك اوقات بحكم الجنان بس مؤخراً يعنى لاحظت ان العيال الملاحدة دول نازلين وش وزن ...
ينتقد انك تفرض عليه شىء ،، ينتقد نظرتك وافكارك ،، ينتقد نظرة المجتمع للبنت ،، حابب الحرية ومشجع لاى شىء يحصل !!
فى الوقت اللى هو واجع دماغنا بافكاره على صفحتة الشخصية وعامل كمان بيدجات يعرفنا عن الالحاد ويحكيلنا ليه الحد !!!
فى الوقت اللى بينتقد افكار اى حد ينتمى للاديان وينزل تريقة !! فى الوقت اللى البنت الملحدة تحط فى بروفايلها صور جنسيه ال يعنى التحرر وهم عقولهم مريضة بالجنس والمخدرات .... اكتر ناس بيعشقوا الجنس والمخدرات هم الملاحدة وينتقدوا المجتمع انه بيحب الجنس !!
الواد من دول يقولك اصل المصاصة بتاعتى وقعت فى الارض اتوسخت وقعدت اعيط وادعى ربنا ان الدنيا تمطر علشان اغسلها وممطرتش اصل ربنا مش موجود ومسمعنيش !!!
يقعد يتكلم عن المثالية والتحرر وعدم التدخل فى شؤؤن الاخرين وهو راشقلك فى افكارك بالعافية !! الالحاد عند بعض الناس شوية كلام "عميك" مع شوية صور مبهمة مع شوية اللاوجود واللاوعى  اللازمان والدود ويشتم فى البشر وانهم حثالة وميستحقوش الحياة  وحاجات غريبة كده مش فاهمها .
يتكلم عن الابتذال وهو اصلا كائن مبتذل  ... ومينطقش كلمة الا بفلسفة ... بس الحقيقة وميزتهم الوحيدة انهم عقليات فعلا كويسة وعقول جبارة بس مستغلين قدراتهم غلط فيهم ناس كتيييير مثقفين جدا وفى قطيع ماشى وراهم ع الموضة وزى مابيقولوا فى شيوخ تكرهك فى الدين فيه برده ملحدين يخلوك تسب الدين للملحدين .

ابن اختى كان دايما يجى يفتح باب اوضتى ويضحكلى ... اقوم اجيبه اقعده معايا ونلعب سوا ...
امبارح بعد الفجر لقيته جه فتح باب اوضتى وجرى ولانه اوقات مش بينام ويفضل صاحى باخده معايا ..
قمت اجيبه اكتشفت ان اختى اصلا مشيت قبلها بيوم هى وابنها واختى التانية ...^ـ^
الصدمة كانت قوية شوية بس عدت ^ـ^ .

نام اظبط منبهك على الفجر اصحى من احلى نومة اتوضى وانزل المسجد ...
بعد كام يوم هتحس انك انسان وانك اتخلقت فعلا لشىء راقى اسمه العبادة ،، كان بينى وبين صلاة الفجر علاقة حب ..
للاسف ضيعتها وبظت بوظان السنين انا صايع اصلا ومش نافع بقى ...
كنت اصلى واخرج من المسجد اتمخطر فى الشارع واقعد ادعى بصوت عالى واستغفر .. اييييييييييييييه دونيا وايام ...
خاب وخسر والله اللى يضيعها صلاة .

بقيت حاوي | مسار إجباري

بقيت قادر ادارى الدمعة جوايا مبينهاش ،، بقيت راضى انام رجليا مقلوبة كما الخفاش ...
ما انا اتعودت احلامى اشوفها بتجرى قدامى وملحقهاش ....

فى حاجات مينفعش فيها العند مهما كنت عنيد ،، مهما كنت بتصمم على الشىء وتحاول توصله ففى حاجات مهما عاندت مش هتوصل ،، فى شيىء اسمه القدر فى شىء اسمه النصيب مرتبط بشوية حاجات اجتماعية ومقاييس تانية دينية او مادية انت ملكش دخل فيها ..
ممكن يبقى فى ايدك شىء وتديه لغيرك رغم انك عايزه ... زى حلم انت نفسك فيه وتلاقيه ماشى قدامك ومتقدرش تطوله ولا تقوله انا بدور عليك ... ممكن تعيش طول عمرك تدور عليه وفاجئة تلاقى حلمك بين ايد غيرك ،، فى حضن غيرك ومع غيرك  دمك ساعتها بيتحول لخيبة ووجع بيجرى فى عروقك ... الحياة ليست عادلة دى حقيقة ممكن اللى اخد حلمك  وفاز بيه ميكونش اصلا كان فى باله بس هو جاله وخلاص ،، هو مكنش عايزه بس اخده بشكل روتينى وتقليدى ... فى النهاية هو فاز وانت صاحب الحلم خسرت !
لو الحلم ده انسانة بتحاول توصلها ؟
ابقى انا عايش هنا بحلم وبعافر وطاحن نفسى وهى هناك عايشة مستسلمة للقدر وللنصيب وللحياة ويمكن ده سر سعادتها برده !
ممكن تكون هى وطنى هى حياتى هى الهوا اللى بتنفسه ويجى غيرى بسهولة ياخد وطنى بدون مقاومة منى لانى مجبر اسكت بمقايس دينية ومادية واجتماعية هو انا كنت مين يعنى ؟؟!
بس قبل ما افكر كده ليه بنكر انى ممكن اكون شخص مش كويس شخص ميستاهلش انه يوصل لحلمه ؟؟!
ليه بشوف القدر انانى والحياة انانية ومبشوفش نفسى انا استاهل ولا لا ؟؟؟
بس انا انسان مش حيوان ولا شيطان مهما كنت بغلط ،، جوايا الخير وجوايا الشر انا بس بميل لطرف منهم اوقات كتير ..
عموما فى شىء بيقولوا اسمه النصيب هو اللى بيحكم فى الاخر ورغم ان النصيب مرتبط بمقاييس الا انى هحاول اقتنع !
رغم ان محدش فى الكون كله هيجبرنى اعيش مع حد انا مش عايزه الا انى هصدق ،، رغم انى مستعد اخسر الدنيا كلها علشان اعيش مع حد بحلم بيه هخرس وهصدق ان النصيب هو اللى بيتحكم مش احنا .
بعد ما احس بالفشل بيجرى فى عروقى مع دمى وبعد ما افقد وطنى وسكنى وملاذى هيبقى فرض عليا ادور على ارض تانية امشى اعيش بعيد عن بلد ضالة كلها ماشية بإرادة عاجزة ... السفر والحياة كغريب هيكون الاختيار الاسهل بعد الفشل .
همشى بعيد عن بلد انا مليش يد فى اى شيى فيها لانى مش بالشكل المطلوب او بالمستوى المطلوب او بالشغل المطلوب او بالتدين المطلوب او بالتعليم المطلوب  بلد بقت راجعة عكس لحد ما هتصد فى قاع الامم  .
فى النهاية لو عندك حلم فى مكسب وفى خسارة فى تعب منك وفى غيرك هيجى ياخد ع الجاهز وده شىء مؤلم .. ابكى لما تفكر بعمق وتتخيل ان حلمك فى حضن غيرك رغم انه مكنش فى باله .!

ظل ينظر الى السماء كثيراً كأنه يبحث عن شىء ذو اهمية ...!!!
عاد الى بيته سىء المزاج اعد كوباً من الشاى ثم صعد الى سطح بيته ينظر الى السماء ويتأمل ...
وحيداً فى الظلام يظن انه قد جمع الكون بين يديه ...
افرغ بطنه من الغازات التى تؤرقه دون عناء ودون انصات ثم اشعل سيجارة وقضى على كوب الشاى ثم نزل .! كتب على صفحته الشخصية بعض الكلمات انه سىء المزاج يليها قليل من الفسلفة ثم نام .
# عن بعض الناس اللى متخيلة انها مثقفة او دماغها عالية .
ـــــــــــــــــــــــــــــــ
ومحدش يقولى قول لنفسك انا والله مابعمل كده ثم انى عمرى ماحسيت انى مثقف او دماغى عالية ^ـ^

دقات قلبى تزعجنى ....!

واضح انى اتهطلت فى دماغى ... !

إستووو ... إعتدلوا .. استقيموا يرحمكم الله .. :(
# شُلت الايادى شُلت وقطعت يا جيش وشرطة بلادى .

كن صديقى اكن لك كل شيىء ... كن حبيبى اكن لك لا شيىء  ..!
فــ انا لست للجميع ... وانت كذلك .!

وكيف اكون بخير وهناك يؤلمك ؟؟ وهناك مايزعجك !!
كونى بخير من اجلى لاننى لن اتحمل ان يصيبك مكروة ...

اشترى جدى قطعة ارض صغيرة كان ينبت فيها الشجر فقطعه !! ثم اقتسمها مع اخرين وحولها الى قبر له !!
فيما كنت انا اسبح فى جسد ابى حيوان منوى لا يُذكر ....
مرت السنين ومات جدى ودُفن فى مقبرته التى اعدها بيديه .. ومن ثم اسرعت انا فى السباق لاكون من من يلقح لــ آتى الى هذه الحياة القذرة وادفن فى القبر الذى اعده لى جدى قبل ان اولد قبل ان تعرفنى الحياة ..!!
تباً ......!

الثورة مش موجودة ،، الثورة مش حقيقة ....!
#ملعون ابوكى يامصر 

وحدى لكن ونسان ...

قبل ما احب لازم افهم حاجات كتييييييييير اوى واحفظها صم عن اللى هحبها خصوصاً وعن البنت بصفة عامة ...
ان البنت دى انسانة ليها احتياجات فسيولوجية زيى ^ـ^ ياسلام عليا عبقرى والله عرفتها لوحدى ....
لازم افهم ان ممكن تبقى ريحتها وحشة لو سابت نفسها ،، لازم افهم انى ممكن تبقى معفنة لو نفسيتها تعبت ،، لازم افهم ان شعرها بيتنكش واوقات بتبقى وحشة جدا شكلاً فى ظروف ما ... مرضية مثلا .. تقعد ترجع بقى وتقرفنى واععععععععععع وكمادات وحركات ..
لازم اعرف ان ليها مزاج مكن يبقى سىء اوقات كتيير ،، لازم اعرف انها ممكن تبقى غبية فى وقت ما ....
لازم اعرف انها ممكن يجى وقت تنرفزنى وتخرجنى عن شعورى ،، لازم افهم انها ممكن تبقى مستفزة فى وقت ما ...
لازم هشوف منها اشياء مقرفة ووحشة ولازم اقبلها لانها انسانة ... لازم اعرف ان جسمها تركيبته كده فى وقت الكل بيشوف البنت اكل وانها ضعيفة ولازم تبقى بالشكل المطلوب منها بدون مراعاه لشعورها ..!!
لازم افهم ان روحها هى الباقية ... لازم جزء من حبى ليها يكون حب افلاطونى حب عذرى بعيد عن لغة الجسد ...
لازم يكون حب تفاهم تسامح احتواء تقدير .....
لازم اتخانق معاها وتعكنن عليا واعكنن مزاج ابو ام خالة ست اللى جابت ابوها ... بس لازم هى تفهم انى بعشق تراب رجليها وانى مهما عملت مستحملش الهوا عليها ....
الحب مش فرض اراء ،، ولا ممارسة نوع مريض من الرجولة بفرض الرأى او الضرب او الظلم او حتى بكلمة وحشة ولا حتى بمجرد فكرة تأذيها ....
لازم افهم ان فى روح تانية معايا وشىء مادى هو جسمها معايا والاتنين اختارونى رغم انى مش الافضل ولا الاروع ...
لازم اشوفها زهقانة ومتعصبة وصوتها اد كده عليا او على ابنى مش لازم تتغير فكرتى عنها مش لازم تتغير نظرتى الجميلة ليها ...
الحب شىء راقى ارقى من الهبل اللى بشوفه وبصد فيه ...
انا ممكن اكلها اكل من حبى فيها ... بس ناوى اطلع الاكل من بوئها وابلعه اعععععععععععععع مقرف ولا يهمنى ...^ـ^
لازم اقدر انفعالاتها ورد فعلها وكل شىء سىء صادر منها زى ماهقبل كل شىء جميل منهاااااااااا .......
الكلام عنها هيطول فهسكت احسن .

اليوم كان باين من اوله انه زفت ومنيل بستين نيلة ...
# ملعون ابو ام الخوف والظلم

الساعة 3 ونص قبل الفجر فكرت ف انى اشرب سيجارة وبما انه مش هينفع ف اوضتى قررت انزل اشربها فى حارتنا !!
وبما ان الرغبة كان غريبة الا انى نزلت حافى وقعدت فى نص الشارع اشربها ... الجو هادى البيوت اشبه بمقابر كبيرة بس سكانها صاحيين .... الحارة صغرت اوى عليا بصيت ع البيوت ... هنا كان عم عبده كنا بنجرى منه لما يجى على حماره واحنا صغيرين ..
الشارع ده كنا بنلعب فيه واحنا اكتر من 10 ولاد وكان كبير علينا وفاجئة صغر !
البيت ده كان فيه عم عبد الحليم ياترى لو ناديت عليه هلاقيه ؟؟ اكيد لا لانه مات ...
طب البيت ده كان فيه عم رفعت لما كنت بشتكى ابنه كان بيضربه لو ناديته هلاقيه ؟؟ برده لا لانه مات ...
كل بيوت حارتنا فقدت روح الارض هى هى ،، بصيت على حيطة لقيت فيها كرات الطين اللى كنا بنحدفها عليها واحنا صغيرين لسه فى 2 ثابتين مكانهم وكلنا اتغيرنا !!
ليه احنا منبقاش ثابتين وكل شىء حولينا بيتغير ؟؟؟
سيجارتى خلصت والفجر اذن صوت الشيخ محمدى اللى كان بيأذن قبله الشيخ محمد ! راح فين ؟
 الفجر هوكمان ثابت واحنا بنتغير ...
جدتى & الناس القديمة & الحارة & البيت القديم & السما & القمر & الصيف & الشتا كلها كانت ذكريات فى حارة ثابته وكل شىء حوليها اتغير !!!

اكره الغروب لانه يخبرنى ان النهاية قادمة ...
احاول الهروب لكنه يلاحقنى ويخبرنى ان النهايات تأتى برغبة منا او بدونها ...!
لا شيىء يبقى كما هو .. الوجوه تتغير ،، الاماكن تتبدل .. لا شىء يبقى ....
حتى انا لا اعرفنى اشعر اننى لست حيا ... لا اشعر بشىء ابداً ...
ربما تغيرت وربما مت .

من قال ان الموتى لا يحلمون ،، من قال انهم لا يشعرون ،، من قال انهم رحلوا ...!
بعضنا يعيش الموت احيانا كأن لا روح تسكن جسده ،، كأن لا شىء فيه يعمل ...
لايشعر بقلبه لا يشعر بالفرح لا يرى الحزن مابين هذا وذاك  يحيا ....
الموتى يأخذون جزء من قلوبنا معهم فقط لانهم لم يخبرونا انهم سيكونون بخير لاننا لانعلم اين يعيشون ....
الذكريات تصبح لعنه بعد رحيل احدهم ... ربما لو قال قبل موته لا تقلق لكنت انا بخير حال ....
انوى ان ابتسم عند موتى لا اريد ان ارى فى عيون من حولى الحزن او اليأس .....
ربما تكون هذه كلماتى الاخيرة ،، ربما يكون لقائى الاخير ثم ارحل وتبقى هذه الكلمات ذكرى ....
ربما يأتى احد المرضى مثلى ويرى كلماتى ثم تنهال عليه اسئلة ستزيد من وجعه وغموض الموت اكثر ...
تُرى بما كان يشعر حين كتابة هذه الكلمات ؟؟؟
هل كان يدرى ان الموت ينتظرة بعد ايام قليلة ؟؟؟
هل كانت لديه احلام لم يحققها ؟؟؟
هل كان يود ان يقتنى شيئا ما يسعده ؟؟؟
هل جاء الموت بخاطرة يوم ما ؟؟؟
تُرى اين هو الان وكيف يترك هذه الكلمات ؟ كيف يهجر هذه الاماكن ؟؟ من سينفض غبار الوقت من هنا ؟؟
لا احد يستطيع هذا الا هو ؟؟؟
يتسائل هل اذا تركت له رسالة سيجيب ؟؟؟ وهل يقتله الفضول فى قبره الان ليعلم من بكى عليه ؟؟؟؟
كلها اسئله ستأتى على ابواب مريض بعقله يرى الاشياء بعمق ..
هون عليك ياصديقى فالموتى عند رحيلهم تمحى ذاكرتهم !! لا احد معهم ....
                                     *****
اتسائل انا الاخر لما اكتب هذا ؟؟؟ لا ادرى لكننى الان ميت اقسم اننى لا اشعر برغبة فى شىء ...
الموتى ايضا لا يشعرون برغبة فى شىء ربما يشعرون برغبة كبيرة فى العودة للحياة لكنهم يعلمون يقينا انهم لن يعودوا ...
ربما حرارة جسدى المرتفعة تجعلنى اهذى كعادتى ... لكن لم يأتينى هذا الشعور من قبل ... اعلن استسلامى
استعد لاحتمال الكثير دون رغبة منى فى شىء .... اشعر ان لا شىء فى هذا الكون يدعوا للسعادة او للبكاء ....
اشعر ان هناك فيه من اليأس اكثر من الامل ... وارى الامل بعيداً عن احلامنا ...

عيد بطعم المرض ...بــ نكهة الوجع ...!

بأى حال جئت ياعيد ؟؟؟
ماذا هنالك يدعوا للفرح ؟؟؟
هناك من لا يملك مالاً لينفق على بيته ،، وهناك من لايملك بيتا ،، هناك طفل لم يرتدى ملابس جديدة كالبقية ....
ماذنبه ؟؟؟ ان ولد فقيراً الحياة ليست عادلة على كل حال ...
هناك من لايملك ثمن جلباب جديد او وجبة طعام تأتى بمناسبة مثل هذه !!
هناك من لا يملك طفلاً صغيرا يداعبه او يأتى له بملابسه ... هناك من يجلس وحيداً ورأسة تذهب الى اخر الكون وتعود ...
هناك الان من يستعد وزوجته ترتدى له اجمل ماجاء لها به من اجله وهناك من تنتظر صدقة من اجل ان تسعد ابنائها ..لا تملك شيئا ترتديه لزوجها زوجها ايضا محطم معنويا لاشىء هنالك يدعوا للفرح وللسعادة فى بلادى ...
هناك من يجلس على احد الطرقات يتنظر من يضع فى يديه بعض الجنيهات ليعود بها الى بيت تأبى البهائم ان تسكنه ...
نحن هنا نتحدث عن الحياة !! نبحث عما يسعدنا !! نرتب بيوتنا لتصبح اكثر اناقة !! نرتدى اغلى الثياب من اجل ان نُرى مهذبين !!
نضع فى جيوبنا عملات من فئة المائة جنيه واكثر ونتفاخر بأننا لا نأبه بالاموال ونبددها فيما لا ينفع فقط من اجل التظاهر بشى ما فى خيالنا المريض وعقولنا البلهاء ..!!
تباً لنا ...
تباً لمشايخنا الكرام ... تبا لحثالة البشر امثالنا ... تبا لغنى يضع الحبر على ايدى الفقراء لئلا يعودون اليه مرة اخرى من اجل بعض الجنيهات ... تبا للكون كله .
ليس هنالك مايبهجنى ... ماذا هنالك يدعوا للسعادة ؟؟؟
هل ينبغى على ان اغمض عينى عن هؤلاء مادمت لا احيا مثلهم ؟؟ تبا لى اذا .

 

:(

وكعادتى فى كل لحظات الفرح تعيس ... :(
كل عيد برد غبى ..
برد
برد
برد
برد
هى اتفاقية البرد دى مش هتخلص ؟؟!!!

اينما وجدت الكارثة وُجدت الانثى ....!
# عنصرية

الاناث هن صانعات التفاهة على مر العصور ....!
#لاسباب شخصية
#رأى

اوعى تنسى حماية العيد ^ـ^

يابرد العيد انستنا مش ناسيك والله زى كل عيد تزورنى وتطلع عين اهلى ...

اهلا بالبرد ...دشدش جسمى كمان وكمان عمرى ماهنسالك زمان كنت عبد للبرشام ^ـ*

# وجع ،، قلة نوم ،، ارهاق ،، يوم عصيب .

وببقى نفسى ارد على كل كلامك بكلمة واحدة ..... بحبك

ــــــــــــــــــــــــــــــ

الصورة بوظت البوقين ^ــ^

متتساهلش مع الناس ده مش هيزيدك تواضع فى نظرهم لا ده هيخلى احترامهم ليك يقل ....

التساهل مبيجبش نتيجة ..!

#نصيحة اخويا الكبير ليا زمان اكتشفت دلوقت انها حقيقة فعلا .!

الدنيا كلها ملهاش طعم ...
الدنيا كلها مفيهاش جديد !!
#اكتئاب شرس

Eleni Karaindrou - The Weeping Meadow

البكاء فى صوت شخص يحدثك يكفى لان تغير حديثك ان كان يؤلمه ... يكفى ان تكف عن عتابك حين تعاتبه ...

يكفى لان تصمت ان كنت تعنفه ،، يكفى لان تخرس ان كنت تحدثه عن الرحيل ....!

هناك من لا يرى هذا الصوت او من يسمعه ويستمر فيما يفعل حتى يكسر قلبك ....!

انانية البعض تجعلهم لايرون الا اخطاء الاخرين وافعالهم ... ربما يمتلكون حياة كاملة ...

وانت لا تمتلك الا روح اخرى واحدة ليست معك فتخبرك انك سبباً فى وجعها وفشلها وكرهها لجنس آدم كله !!

تعلم يقينا انك تتنفسها وتخبرك انها ستتركك لانها لن تتحمل !!!

ربما ايضا لن تتحمل ان تدخل رئتيك بعد الان وربما لا تتحمل حبك لها لانها لا تعلم مايدور داخلك ....

لاتعلم كيف ترى الامور وكيف تفكر هى فقط تراها كما يحلو لها وتفعل ما عليها فعله تهددك بالرحيل مراراً ...

فتبكى وحيداً دون ان يُسمع صوت بكائك ... ودون ان يراك احد حتى لا يصفك بالضعف او الجبن ...

فتعود وتخبرهم انك مازلت تحبهم وتلح فى ترديد انك لا تريد الرحيل فيعودون بكلمات لاتشبه كلماتهم الاولى ...

فتعود ويرحل حزنك كطفل بين احضان امه .. 

لكنهم لا يعلمون مايحدث لك فى غيابهم لايدركون ان هذا يؤثر فيك وانك لاتنسى انهم سبب بكائك وانت رجل ياصديقى .

وما اغلاها دموع الرجال ... ومايؤلمك اكثر ياصديقى اعترافهم الدائم بالحب والعشق لك ... فتتسائل هل هذا هو حبهم ؟؟

هل مايفعلون بى هو الحب ؟؟! تبا للحب اذاً.... 

مرة تلو الاخرى وانت من سيرحل انت من سيقرر انت من سيضع قلبه تحت اقدامه ويرحل ...

عند رحيلهم عنك كنت تشعر بالاختناق لانهم هوائك ،، وعندك رحيلك انت لن يتغير شىء .

انا مريض ...... ^ـ^

فكر .. حدد ... خطط ... اشتغل ونفذ ... هتفشل !!
تانى اتعلم ..عاند ... فكر ... حدد .. خطط ... اتعب اكتر ونفذ ....
وتالت
ورابع
وعاشر
والف
"ومليون تلتمية وعشين الف وواحد "
ومليار الى مالا نهاية لسة معايا فرص .... طول ما انا عايش بتنفس لسة ...

انا عندى حلم مش هسيبه مسيرى هنجح .
#متفائل .

شمىء ممتع لا ده قمة المتعة انك تخلى حد يفهم انك غبى !! يااااااااااه شعور بيخلينى مستكنيص اوى والله بجد ..
لما تقدم لحد شىء وهو بيتمسكن فياخده ويحس انك غبى !!
لما تقعد تتكلم مع حد اكتر من مرة فى شىء وهو مصمم انه صح فتيجى تقوله انا كنت غلطان انت صح وتحبك الدور اوى ...
ويشعر بلذة الانتصار ياسلام ع اللحظة دى  بتفرق معايا اوى ....
بس لما الاول يجى مرة يتنطط عليك ساعتها هتقوله انك كنت عارف هو بيطلب باى شكل وانك مكنتش غبى .... اوبا .
والتانى خليه فاهم انه صح ومفكر نفسه حسن شحاتة لما طلع ميدو ونزل زكى .
# عن اد ايه بتقابل ناس زى البهايم وتحسسهم انهم فاهمين كل حاجة حتى النموسة بتعيش كام يوم .!

تهب رائحة جميلة لا اعلم مصدرها فأتذكر حبيبتى ... ^ـ^

بدون ارادة منى اود ان اكتب لها .. فيصبح عيداً للحروف وتصييح فرحاً ... !

أول الحروف صراخاً "الحاء" تنادينى ضمنى الى الباء خذنى وضعنى جانبها ! فتصبح "حب" فتضحك الكلمة حين اكتمالها وتقول اخبرها انها الحب .... فانها تستحق ...

فــــ يغار حرف "العين" ويصرخ انا هنا خذنى وضمنى الى "الشين" فــ اقربه فيهمس لها ويحرضها ... فتصرخ "الشين" ضمنى الى "القاف"  فأضمها ... فتدب الروح فى كلمة "عشق" وتبتسم وتقول فى خجل انا اكبر من الحب .. فقدمنى لها ... اخبرها انها العشق ...

فــ انها تستحق ..

تتهافت الحروف وتنادى ليكون لها نصيب مع حبيبتى ومليكتى ... فأخبرهم اننى احمل داخلى ما لا تستوعبونه .. احمل لها مالاتطيقه الحروف والكلمات ... اخبرهم انهم ليسوا الا فقط حروف  !! وان كل كلمات الكون لن تكفينى لاخبرها مدى حبى لها ...

تقع عينى على "الميم" فيضحك بحقد ... ويخبرنى سأنضم لــ "واو" ذات يوم ثم تأتى "التاء" فنصبح الموت وترحل لتتركها :(  ..

فيصيبنى الوجع وانكسر حزنا على فراقى لها يوماً ما ...

فيأخذ الحب يد العشق ويأتى مسرعاً وبصوت عال يحمل الفرح ... ليخبروا الموت حتى وان رحل سنظل معه للابد .