ده كان تعليق علي حد مكار عندي .. لكن أظنه اكتر تعليق شبهي فعلا .

شوفي ما تعامليش الناس علي انهم شيء مستمر في اتجاه واحد ، أنا شخص سهل بحترم رغبتي ورغبة اي انسان في الحياة كشهوة كتصرفات كفكر وكفلسفة حياة لكل واحد منا ، أنا ممكن أعمل للي قدامي اللي يحبه حتي لو غلط أو مرفوض في نظر ناس تانية ، مابحبش اخسر حد او بحب اقسي علي حد ، ممكن احافظ علي اللي قدامي حتي لو حصل بينا ايه .
أنا بشر بغلط واصيب واتجاوز واتوب ، بمشي من حياة الناس وانا محافظ عليهم في غيابهم ومستحيل أأذي حد او استغله لسبب ما .
أنا كويس جدا وجدع وراجل واشيل مسؤولية ناس كتير وانا مرتاح ، أنا ملتزم وبخاف من ربنا كتير ، أنا بعمل ذنوب وبغلط ، أنا بندم واتوب وساعات لا ..
النفس البشرية هي اللي كلها تناقض مش أنا بس ...
أنا مش كذاب وما بسعاش امتلك شيء غير طموحي اما الناس فاللي موجود هو في امان ولو حب يمشي هو في امان ولو حب يرجع هو في امان برده قلبي مش اسود تجاه حد حتي لو مؤذي ..
اتعودي في حياتك ما تحكميش علي حد ولا تحتاري اصلا في حد وما تقفيش عند نقطة واحدة وتفكري .. الدنيا واسعة والمرونة مطلوبة في الحياة الدنيا مش مستاهلة نعادي حد او يكون لينا خصومات كتير ..
أنا مش زعلان أنا أعرف كل عيوبي وخبايا نفسي السيئة وشايفها وساعات بتفاجيء من رد فعلي كمان لكني دايما بقول ربنا يكفيني شر نفسي وشر الشيطان .
خلاصة الرغي ده اني بشر واللي يقف يشاور مين حلو ومين وحش ومين كذا وكذا مش هيرتاح .
مافيش تشوش ولا حاجة كبري مخك لو ما تعرفينيش شخصيا .