بشكل ما انت قبل ما تموت بساعات هتكون عارف حتى لو سليم معافى او مريض فى سريرك ..!!
بشكل ما هتبقى واعى وبتفكر فى شىء دنيوى بحت رغم  معرفتك بانك فى سكرات الموت !!!
بشكل ما هتبتدى تفقد الوعى وتدخل فى غيبوبة الموت والكل حواليك شايفك نايم بس انت دماغك شغالة مش واقفة ...
هتفتكر مواقف تضحك فيها ... هتفتكر ناس نفسك كنت تحقق احلامك معاها ... هيصعب عليك نفسك ..
هتفتكر موقف وتخجل من نفسك ... وسط الالم اللى هتحسه بطلوع روحك ... انت برده بتندم على شىء !
هتسخر من نفسك ومن جريك فى الحياة علشان تحقق احلامك وهتعرف ان الموت سبقك واهو بتموت !
هيبقى نفسك تقولهم  سيبونى فى اوضتى مش عايز اندفن لوحدى بعيد ...
كل حياتك هتعدى قدامك وهيبقى نفسك تبكى لما تلاقى ناس كان  نفسك تكمل معاها حياتك ومقدرتش ..
هتموت مشنوق بــ افكارك ... هتموت متغاظ ... هتموت وتقول ياريت كان فى العمر بقية ..!
هيبقى نفسك تقول كلمة مش هتتقال ...
بس اكيد هيكون فى شىء يحسسك بالامان قبل ما تموت ... حاول تنسى .. حاول تفضى دماغك ..
حاول متخافش لما الدنيا تضيق بيك وجسمك يتخدر ويوجعك ونفسك يضيق حبة حبة ...
حاول تكون شخص مسالم ومتعاون محدش يعرف اللى بيدور فى الكواليس يمكن ملاك الموت يكون بيطلب شىء ..
حاول تساعده فى انك تخلص .. حاول تبتسم وانت بتموت ...
حاول تقول خلاص انا بنتهى وتستسلم وتثبت ...
لما يقرب منك الموت صدقنى .. هتلاقى نفسك بتودع كل حاجة بتلقائية شديدة .
انا مش عارف انا بقول ايه بس متنساش تتقف فى وش الشيطان لو جالك .