في حاجات لازم يكون الشخص فخور بيها وعارف انها حاجة تُضاف ليه ، كل قرار اخده صح ، كل فكرة نفذها صح ، كل موقف أتصرف فيه صح لازم يفتكره وقت ما هو حاسس انه ضايع .. أنا فخور بنفسي لما كنت لسة في ثانوي وبودي الشغل للورش ولما يدوني بقشيش كنت ارفض واقولهم ده شغلي وباخد مرتب عليه فمش محتاج إكرامية .

وانا فالجيش كنت حرس علي مدينة سكنية تحت الانشاء مهندس الموقع والزائرين واللي لهم شقق كانوا كل مرة ادخلهم من البوابة يعرضوا فلوس بشكل مُلِح وانا كنت برفض سواء ليا او للي معايا بحكم اني كنت اقدمهم ، بعدها عرفت ان العساكر اللي كانوا قبلي كانوا مقلبين الكل والمهندس ده كان بيعاني علشان يدخل عربيات الرمل والطوب والزلط وكان بيدفع مبالغ كل مرة يكون له عربية برا ... كان بيجي كل يوم يعدي علينا يقعد معانا ويسئل عن ظروفنا وعننا ويناقشنا ويدينا نصايح وخبرة ويمشي .. الراجل يأس لدرجة انه عرض يجيب لنا غدا رفضت .

ماعتقدش انه عمل كده مع اللي قبلي او حاول يقرب منهم .

أنا كل ما بفتكر مواقف لي كتير بحس اني فخور بنفسي لاني زي ما بحكي عنها دلوقتي أكيد بيتحكي عني اني شخص أتصرف صح في مكان غلط .

افتكر مرة شفت ولد شقي جدا وبلطجي فعلا كان بيحب بنت امها حاولت تصاحبه وتديله فلوس واكل علشان يبعد عنها رفض بعزة نفس رهيبة وبعد عن البنت ونسيها .

في حاجات بتتشال فالنفوس والقلوب ونعوذ بالله من الندالة ودنائة النفس وحب الذات والمصلحة وقلة المروءة وسوء الطلب وفضح الخلق .