ورغم النوم القليل النهاردة فايق عايز اسمع مزيكا ،، عندي شهية للقراءة بس مش هقرأ حاجة ..
مزاجي معتدل .. مليش طلبات ولا احتياجات ...
هقعد لوحدي وده شئ ممتع ...
قررت أأنتخ خلاص مش هشتغل .. أو في انتظار البدء من جديد ،، محتاج لنفسية تانية وظروف ثانية علشان ابتدى احط خطة وهدف أوصله  ،، يا مسهل .
جعان ... ناسي كل الناس ومش فاكر غيرها هي وحشتني جدا وحشني كل حاجة فيها كلامها وطيبيتها وحنيتها اللي بتخاف تظهرها ..
واحشني افعل ما يحلو لي في وجودها 😊😊
لما بس بتخيل اني ممكن اصحى ف يوم مكتئب أو متعصب والاقيها جنبي بتلقائية كده بنكر جوايا اصلا لو هي معايا مفيش حزن ولا اكتئاب هصحى منشكح ....
أنا مجربتش احساس السعادة والفرح الدائم قبل كده بس أقدر اوصفه كويس اوى لو تخيلت أنها معايا وجنبي ،، ممكن اتكلم عن الخلود باستفاضة لو مسكت أديها ... ممكن اكلمك عن حتة من الجنة بين اديا لو امتلكتها ،، ممكن اوصفلك علاج سحري لحالتك لو حضنتها .. هستغني عن المسكن لو بصيت ف عينها ..
متأكد أنها لو ملكي كل صباح لما احضنها قبل ما أنزل هكسب كل معارك اليوم ،، متأكد اني هحسم كل حروبي لصالحي من أول جولة وبس لأن سعادتها سلاحي ،، لأن ضحكتها درعي ،، لأن عنيها ملاذي 😊
التفكير فيها بس ليه مفعول السحر ع مزاجي وحالتي ورغم كده بخرجها برة دايرتي كتير !
ومتقبل جدا فكرة أنها مش ليا !
عادي ممكن مرة اروح اشوفها ،، الزهراء مش بعيدة .